Cikël me poezi nga QAZIM D. SHEHU
Thinjat nxitojnë,
Vetëm në zemër nuk shkojnë
Kështjellë e shpirtit në bedena,
ushtarët e ndjenjës gati mbajnë,
ushtritë e thinjave rremba rremba,
t`i gjuajnë me armë…
kështjellë e shpirtit nuk dorëzohet
në tym të tyre tek zhytet,
veç mençuria mjerohet,
në mjegull të përhime mbytet…
KUPTIM I MOSKUPTIM
Ikin vitet
Rritja e tyre më ha në gji,
Kreshpëron dëshirat
E më pak më japin fuqi…
Sa herë kështu rrija pranë bimës
Si fshatar pasionant,
Pa ia kuptuar rritjen
Ngritur në mëngjesin sharmant.
Kuptim i moskuptimit ngecën,
Kur ndodhesh para faktit,
Pa kuptuar si vitet ecin
Në mungesë të taktit…
TRUPI
Në neps,dridhje, tmerr
Fërgëllon qejfqeder,
Dridhet, çlidhet në ankth,
Mornicat, eter.
Klithje, vidhisje
Foleza qelizash,
Lëkurën kandisin,
Delir përtese
Shkrirje vese,
Lart ngrihet shpirti
Mugullueshëm
Si një re nga honi,
Duke e lënë në ëndërrime
Trishtueshëm…
ILUZIONET
Iluzionet me fasho i mbështjell
Si të ishin plagë,
Iluzionet janë flakë.
Ajo vajza atje,
Më duket, më do,
Dhe një drejtësi si një re
Do flladisë këdo…
Iluzionet shpohen si fluska
Në çmeritje vështrimi,
Të bukura
Në kthetra shëmtimi…
Me lëkurë shpirti i mbështjell,
E me kujdes i vë në rrugë,
Ndonjërit që s`ka iluzione
Mund t`i japin bukë…
Dhe era mjaullin në mbrëmje
I fshikullon me përbuzje
Duke ndeshur pragjet e tyre të ujshme…
MASKA
Mbaj një maskë,
Nga një shoqëri e drejtë,
Sugjeruese pafund…
Tani s`di ç`ti them asaj
Duke dënuar veten,
Maska më rri xhaketë në kremastar
Që më duhet ta vesh patjetër,
Për të mos ndjerë ftohtë
Në dimrin e shoqërisë,
Maska,
Një fytyrë e përzhitur në mungesë,
Një trill i konsoliduar keq,
Aq të pamundur e kam ta përzë,
Sa po të tentoj
Fytyrën peng t`ia lë…