-Fasadizmi është hyrje në gjeografi kur nuk ke vënd histori.
-Manipulimi zgjedhor prodhon pushtetin e karriges së kalbur.
-Njeriu që shet votën është më pak qënie politike e më shumë shtazore.
-Ëndrra e pushtetit të pamerituar është meritimi i pushtetit pa ëndrra.
-Zhngënjimi i humbjes dhe ekstaza e fitores prodhojnë rrënimin.
-Humbja me dinjitet e rikthen fitoren sërish, fitorja pa dinjitet sjell humbjen e pakthim.
-Konsumimi në politikë bëhet politikë e fermentuar.
-Politikanët fjalëshumë janë njerëz mëndjepakë.
-Ftesa për bashkëpunim politik mbas konsumimit është ftesë pas vakti.
-Njeriu që nuk ndan dot gënjështrën nga e vërteta është viktimë e mashtrimit të përhershëm.
-Më mirë një premtim i mbajtur se një mal premtimesh të rrejshme.
-Varfëria dhe injoranca prodhojnë autoritarizmin.
-Pema e demokracisë gjelbëron mbi prosperitet dhe dituri.
-Kujtohemi për mjekun kur sëmuremi, për mësuesin kur nuk dijmë, për politikanin kur varrosemi.
-Kemi kolaps kur pushteti nuk qeveris dot me mënyra të vjetra dhe opozita nuk vjen dot në pushtet pa mënyra të reja.
-Rinia është flakë pa prush që shuhet shpejt. Pleqëria është prush pa flakë që shuhet ngadalë. Shtresa e mesme është flakë dhe prush që zgjatë më së shumti.
-Njeriun e dalëboje, nuk ka bojë që e lyen.
-Njeriun e pabesë nuk ka besë që e mban.
-Njeriun mashtrues e vërteta e mundë.
-Pema e jetës është e sotmja mbi të djeshmen, e nesërmja mbi të sotmen, asnjëra pa tjetrën, askush i përjetshëm.
-Pushteti pa legjitimitet është shtëpi pa themel.
-Pushteti pa përgjegjësi është han pa porta.
-Pushteti pa transparencë është tunel pa dritare.
-Pushteti pa gjithëpërfshirje është kasolle e izoluar.
-Pushteti pa legjitimitet, përgjegjshmëri, transparencë e gjithëpërfshirje është rrënojë mbi kokat e njerëzve.
