NJË BRENGË
Një brengë e fortë seç më bren,
Udhëhumbur jam ,në jerm,
Fillikat bohem.
Xhevahiret që shkëlqejnë
Qoftë tek një femër,mendimtar,
Njeriun e vogël më shkërbejnë
Që ngrihet guximtar.
Në sa tribuna, manifeste
Në sa vakësira, gjeste,
Dhe çdo mendimi i vë
Të veten feste…
BARKU I KOHËS
Koha mbushet dëng me hipokrizi
Siç, mullari mbushet me bar.
Dhe mund ta hapësh barkun e tij
Për t`u strehuar nga shiu në behar.
Po barkun e kohës si mund ta hapësh
Me kopilimin e keq të tradhtisë së saj,
Më mirë të kërkosh që ajo mos lindë,
Se po lindi, lind këlyshë dhe zagarë…
NË MAJË TË VËSHTRIMIT
Në majë të vështrimit si në një shkop
Ku ngremë mundësinë për të kapur një kokërr mollë,
Befas ngrita sot një dëshirë që s`më ngop
Të kap me të një re të hollë.
Dhe ta afroj pranë vetes e ta pyes
Pse aq në qiell është holluar,
Kur dje ishte e ndërdyzët
Me një tufë resh etjeqorruar.
Por sakaq ishte shkrirë krejt
Kish mbetur sa një cipë qepe,
Dhe si të qe ajo,vështrimi uli shkopin e tij
U përplas në kokën time;
Dhe në sy më çoi një të qarë djegëse…
FJALËT
Fjalët kanë ftohtë
Fjalët ndizen në ftohtësi.
Shpirti kur ndjen ngrohtë
Mban për vete
Të madhen dashuri.
Tek bërthamë e tyre nuk ço
Asnjë injektim
Dhe kur u duhet,ato ikin
Pa kthim…
KLITHMA
Sapo gjahtari çiften ngrehu
Një klithmë rose iu përplas në vesh,
Dhe shtiu ,me barot ngjeu
Liqenin e thyer në pasqyrë në rrebesh.
Trupi i rosës ra mbi kallamishtë
Zagarët vrapuan dhe ia sollën,
Po klithma,ku shkoi ajo klithmë
Pse saçmet s`e asgjësuan të gjorën?
S`qe veç vegim dhe u drodh i tëri
Me rosën në strajcë,
Veç afër muzgut hëngri
Nga klithma një dackë…
SHËMTIA
Edhe pse themi se jemi të bukur
Shëmtia del nga ne,
Demonin e saj shkundim
Dhe hapat s`ia vemë re.
Ajo veç gjithnjë na bind
Se s`mund të ekzistojë pa ne
Se kur një fëmijë lind
Të parët seksin i vemë re…