Mijëra vetë në të gjithë Poloninë protestuan të mërkurën kundër një propozimi të partisë nacionaliste në pushtet që nëse miratohet do të lejonte shkarkimin e gjyqtarëve nga detyra nëse ata vënë në dyshim legjitimitetin e reformës në drejtësi të ndërmarrë nga qeveria.
Pas fitores në zgjedhjet e muajit tetor partia qeverisëse për Ligj e Drejtësi (PiS) u angazhua të kryejë reformën në sistemin e drejtësisë, gjë që e futi atë në një kurs përplasjesh me Bashkimin Evropian. BE-ja ka argumentuar në mënyrë të përsëritur se reforma shkel ligjet i BE-së dhe kushtetutën e Polonisë. Por PiS-ja thotë se reforma është e nevojshme për ta bërë sistemin gjyqësor më efikas.
Disa mijëra vetë u mblodhën përpara parlamentit në Varshavë. Protestuesit thërrisnin “liri për gjyqësorin!” dhe “ne do të fitojmë!”. Projekligji i qeverisë pritet të diskutohet në parlament ditën e enjte.
Sipas një opinioni të zyrës për kërkime të parlamentit polak, projektligji ashtu siç është paraqitur mund të jetë në kundërshtim me ligjet e BE-së, teska vë në dyshim pavarësinë dhe paanshmërinë e gjykatës e gjyqtarëve. Në fillim të këtij viti në Poloni u zhvilluan protesta pas pezullimit të një gjyqtari nga qyteti i Olsztyn-ut i cili vuri në pikëpyetje reformën gjyqësore të propozuar nga partia në pushtet.
