Poezi nga Sami MULAJ – Amerikë
…sot, në Tiranë…me pak pak shi dhe pak si trishtim:
në kryeqytetin e vendit tim kam nevojë për interpreter të gjuhës, nuk mundem të bëj porosinë në restorante, pasi nuk më kuptojnë në shqip dhe as unë nuk i kuptoj në shqip ata….dhe kam frikë se gjuha shqipe po soset e shumë shpejt kaq e deformuar do tjetërsohet në jo gjuhë shqipe…(?!)
Edhe pak vargje:
….
Shtyhem
çdo dite me poezinë,
dal i humbur…
….
në vrella ulemi në gjunj,
lutja më e bukur,,
kuajt nuk pijne pas nesh ujë…
….
druvarë mbetëm gjithë jetën,
pa e ditur
se çfarë bëhet me lisa…
….
qytetarët në revoltë për gratë e qeveritareve,
pse ato nuk flejnë me burra…
….
dje
me gjuhë të huaj
përfundoje në burg,…
…
sot
me gjuhë të huaj
largohesh nga Shqipëria….
Janar 11, 2025
Tiranë, Albania
Vetëm pak vendlindje…në vargje dhe me disa shkrepjet fantastike nga fotografi ynë i madh Fadil Berisha tani që edhe urimet, çertifikatat e çmimet filluan pushimet….!
BJESHKA
Kujtimet e mia,
fluturojnë,
pa stacione…
SHKELZEN
Sa afër
e sa larg…
ëndrrat përkundin djepin tim.
GURRAT
Gurgullojnë,
zanat pijnë gji
u bënë nëna.
VALBONË
Qielli i dhimbjeve derdhet aty,
dashuritë bëhen të kaltra,
shpellë e zogjëve
zemra ime.
K’CIMI I TROPOJËS
…në shpatet e thepisura
gjuha e zotit u ndëgjue,
trupi filloj me folë…
kembët e puthin tokën,
krahët rrokin qiellin
e sytë e zbritën në tokë
diellin…
Janar 7, 2025
KOHE PA NJERIUN
Oxhaku
ka kohë që tym nuk nxjerr.
Veringtë e bukatorës
në hi kanë mbetë
Luga e gacave
e xhevzja e kafes,
në murë,
në gozhda vjerrë…
Dera e odës e burrave,
si sirenë alarmi,
në thinza pisket…
E në dhomën e gjumit,
nën jastek,
dy telefona vlojnë,
në dy cepat
me ciu, ciu prej miqësisë
në erë,
në mjedis të krevatit,
dy trupa shpinë për shpinë,
në mes kanë një det…
Janar 2, 2025
New Jersey, USA
TË RROKI… !
Sa e mirë kjo fjalë !
Për gjithë moshat.
Edhe për gjyshat e gjyshet është kryefjalë.
Të përqafoj, apo të puth tingëllon si një fjalim zyrtar. Është si me i thye në gu do krande të thata.
Të rroki është krejt shpirt, është fjalë e gjallë e drejtpërdrejtë pa ngjyra seksiste a feministe,
Kaq të bukur fjalë, që zoti na e ka falë vetëm ne po e harrojmë…
T’koftë i gzuem Moti…!
Moti, për senen e re (Vitin e Ri )më e bukur fjalë…!
Vetëm ne e kemi…!
Ajo eshte fjalë e gjallë…
Viti para fjalës Mot duket si diçka krejt e huaj, e ftoftë dhe jo shpirtnisht e embël dhe e pa plotë. Fjala Viti është si diçka përcaktuese, si një inventar magazine e Moti kurrsesi.
Ai i bashkon të gjitha shpirtnisht edhe kohën si vijë gjeometrike e pa kufizuar, por edhe brendinë jetësore -për njeriun e për klimën.
U gzofshi Mot mas Moti…!
DIMENSIONI i PESTË
Dua të mat
qiellin tim të vogël
të pamatë.
Me krahët e mi,
si zog fluturus
pushtoj hapësirën tredimensionale,
me krahët hap shpalos pash pash gjatësinë dritëplotë të yjeviteve të mia në radhë, midis gishtit të madh e të vogël,
trashësinë e hijebrengave
e me gishtin tregues lart, lartësinë e erës së gëzimkujtimeve,
pemë e ndriçuar që lidh tokën me diellin,
në natën e ndërrimit të vitit.
dimensioni i katërt,
koha kordinatë
si lodër përjetësimi,
shtyn akrepin e orës në ditën tjetër
rinis pa u ndal udhëtimin…
pemën plot errësirë e drita, katër dimensionet,
kordinata drejtkëndore e mbajnë
por nuk e rritin drejt qiellit.
Pa dashurinë,
dimensionin e pestë,
jeta do të ishte një hapësirë boshe,
një rrëmujë yjesh pa dritë,
pa fytyrë prej diellit.
Dhe pema e vitit të Ri
pa oborre gëzimi.
REVOLTA E BREDHAVE
Ah more njeri
sa i pashpirtë je,
rininë tonë e keputni
pa e kuptuar sepse.
Thoni të gezoni në vatra
e në oborre me ne…?!
Na ngarkoni me letra gjithë ngjyrash,
me foto e drita…
e midis pakosh bosh
në sheshe e sallone si të dënuar me vdekje,
na gozhdoni atje.
Pas disa ditësh
na hidhni të vdekur mbi dhe…
Na lini të qetë,
aty ku kemi le,
të na mbulojë bora
e jo pambuku juaj,
borë e pafytyrë,
zogjtë të kendojnë e dreret le të flejnë me ne.
Po të sillnim dashuri,
nuk kishte nevojë të vinim ne atje,
ju do të vinit,
e si ketra do kcenit,
ketu në pyllin e jetës me ne…
Dhjetor 30, 2024
New Jersey, USA
KOHA E SHËMTIMIT
(kushtuar nenës të ish të dënuarit politik, Shpend Çela, që provoj tmerre prej diktaturës)
Oh, e mjera nanë
që linde një Shpend,
e bane të bukur për qellë,
ta shtinë një jetë në terr…
Oh, e mjera nanë
për fajin tend,
Pse e bane djalë të pashëm,
atij i falën tmerr…
Oh, e shkreta nanë
për djalin tënd…
ta dënuan se e bane t’bukur…
Koha e shëmtimit edhe bukurinë e bëri ferr…
Oh, e mira nanë,
shpirti yt,
ndrit, ndrit përherë…
Zoti të ka pranë,
ty që solle të bukurën në jetë…
Janar, 2025
Pak humor për ne të moshës së tretë…që e pranuam apo jo ka ardhë…
BURRAT E VAKTIT N’PASQYRA
Në banak,
aty në Bar Kabare,
porositën birra,
ishin tre.
erdhën të kullotin pak sytë,
tre burra t’vjetër,
burra vakti,
të njohur, me kollare
me mustaqe,
me parti
e me fe.
të mira mollzat
thotë njëri për kamarjerën,
ma të mira mollat ja pret tjetri e i treti, a ha si i paska shishet bre.
të tre njëherësh i thonë, kamarjerës gjysmë të xhveshur,
me gisht nga banaku,
shikoni, shikoni atje përballë,
paska edhe ma të vjetër se ne,
me birra përpara e me sytë si vjedhës në pré…
duke qesh me të madhe kamarjerja,
ju a kthen si rrufe,
të shkretët vetëm pijnë birra,
kanë turp,
nuk janë si ju,
sytë i mbajnë përdhe…
porositeni një rend për ata,
janë më të vjetër se ju,
për pesë dollarë
të shkretët plakushë nuk e shijojnë ketë dhuratë të zotit,
jua afron gjoksin e fryrë,
e prekeni, prekeni,
mos rrini si ata të mjerë.
të tre e prekin menjëherë,
i lëshuan 15 dollarët e prekjes,
edhe për pleqtë paguan
nga gëzimi pa i njeh.
kamarjerja puth pasqyrën mbrapa saj,
i thotë “sa e mirë më je!”
ju tund shalet prapa e
krekosën pleqtë përballë,
duke paguar dy herë,
pa e ditë se janë vetë ata në pasqyrë,
atje.
Dhjetor 26, 2024
New Jersey, USA
MOS E TRAZONI PARASHQEVINË !
Parashqevi,
Parashutë,
Paradhënje,
Parathënje,
Paradite,
Paradoks,
Paranojë,
Parazitë,
Paralele,
Paditës,
Padije,
Pafytyrë,
Pamatë,
Pamasë,
Paanë,
Pasheqer
Pakrypë,
Pakrye,
Pagojë,
Palidhje, fjalë shqipe e re
në Kosovë !
Lëreni të qetë Parashqevinë,
artistën tonë, zonjë.
Zonjë e bëri zëri,
Zonjë e bëri kënga, dhe kaq.
Pjesa tjetër është e Parashqevisë,
Nuk është pjesa jonë !
Mos e trazoni Parashqevinë !
Dhjetor 18, 2024
Tiranë, Shqipëri.
