“Lurë e dashur, Lura ime”
Thotë gjithsecili në fjalime
Por kur koha është të mbrojnë
Të gjithë tek gjepi plot vrapojnë.
Sa fjalë boshe, ligjërime
Ke dëgjuar gjer më sot
Sa bij e bija të janë vrarë
Në hakmarrje e zënka kot?
Sa gjak është derdhur në tokën tënde
Në shtëpi, në rrugë, në shesh
Je e lyer kuq e zi
Vajzat e tua me hundë përshesh.
Sa nipër mbesa kurrë nuk do njohësh
Se prindërit larg kanë shtegtuar
Në të gjithë botën janë shpërndarë
Për një copë bukë kanë emigruar.
Ty të mbajnë të gjithë në gojë
Por të ruajë asnjë nuk di
Të kanë vjedhur e poshtëruar
Në ç’do anë çdo bukuri.
Të kanë rrjepur, të kanë vrarë
Shpirt e trup të kanë shëmtuar
Të kanë bërë si vend të shkretë
Me pyjet tua janë paguar.
Dhe ata që s’të kanë vrarë
Dorën se vënë të ndihmojnë
Kanë ndenjur më anë duke parë
Thonë; “Nuk dimë si të veprojmë”.
Një hap njeri se hedh përpara
Drejt mirëqënies e drejtësisë
Se ryshfeti mbizotëron
Në ç’do derë të Shqipërisë.
Sa e humbur më je dukur
Kur pas shumë kohësh të kam parë
Si një varr i shkretë mu duke
S’ka gëzim, vetëm të qarë.
Ti gjithmonë je masakruar
Që në lindje, nga çdo njeri
Por më keq ti je trajtuar
Ka njëzet vite, deri tani.
Malet gjithmonë të përcëlluara
Mbaj mend unë në fëmijëri
Dhe ato që lashë, sot s’janë më
Të kanë bërë qymyr e hi.
E pa rrugë e pa lidhje
As me botë as kryeqytet
Kush të ngrihet më i pari
Për dy lekë t‘vjetra ty të shet.
Kur u ktheva pas dy dekadash
Të kam gjetur lakuriq
Male fusha janë rraskapitur
Burrat e tu rrinë këmbëkryq.
Adhurojnë zot e perëndi
Por dhunojnë fëmijët e tyre
Rrahin gratë në shtëpi
Si të jenë lecka i kanë për he.
Mbajnë fjalime kot më kot
Kështu ata të nderojnë ty
Pushtetarë e bij të Lurës
Mblidhen kuvendeve si minj të zi.
Dhe të quajnë “Perlë të Evropës”
Të verbrit me dy sy
Të kanë rrjepur si pulë në valë
Të kanë bërë varr të ri.
____________________
Irena Vladi May ka lindur në Tiranë dhe u largua nga Shqipëria në dimrin e vitit 1997. Ajo lëvizi në Florida në vitin 2003, ku jeton dhe sot me katër fëmijët, burrin dhe macën e saj Amora.
Kjo poezi është marrë nga libri poetik i autores “Kur unë të kthehem”, botuar në Amerikë dhe, kohët e fundit edhe në Shqipëri, me përmbledhje të disa prej poezive të saj nga shkolla e mesme (që i shpëtuan zjarrit) dhe disa të vetme vitet e fundit për të përfunduar librin e saj. Ajo u betua në verën e vitit 1999 se nuk do të shkruante poezi në shqip për të protestuar kundër dhimbjes që i shkaktoi vendi i saj i lindjes. Me gjuhën e prerë dhe zemrën të thyer ajo emigroi jashtë vendit ku nuk u kthye për të vizituar për 17 vite rrjesht.
Libri i saj i parë me poezi titullohet “When I Am Done I Will Rest My Case” që është botuar në USA. në anglisht përmes Amazon, në letër, dhe e-libër në Kindle, gjithashtu në Barns dhe Noble. Libri i saj mund të blihet përmes Amazon në Amerikë, Angli, Gjermani, Francë, Itali, Spanjë dhe Japoni.
Ajo është duke përfunduar librin e saj të tretë me poezi: “The Girl With A Single Pearl” si dhe librin për fëmijë “Sharky McTarky.” Gjithashtu ka përfunduar edhe libra të tjerë për fëmijë që janë në ilustrim dhe do të shkojnë në publikim së shpejtë.
Ju mund ta kontaktoni me email: irenaflux@gmail.com
