Muzika shqiptare gjithnjë ka evoluar por me kalimin e viteve njerëzit sa vijnë e bëhen edhe më nostalgjikë për hitet e vjetra, dhe nga dëshira për të rikthyer tingujt e dikurshëm, shumë artistë të rinj shqiptarë, u fokusuan në risjelljen e hiteve të dikurshme në versionin “remake”.
Në vazhdim ju prezantojmë disa nga hitet e famshme të kënduara nga ikonat e muzikës shqip dhe që u ripërpunuan nga artistët e rinj:
“LULE BLINI”
Versioni origjinal: “Moj lulja e blinit”, Fatmira Breçani
Ripërpunim nga: Trim Jetullahu, 2017
Trim Jetullahu ishte ai i cili do ta sillte këngën “Lule Blini” që në fakt është përzierje me këngën me po të njëjtin titull të Fatmira Breçanit, zëri i të cilës dëgjohet në refrenin e këngës. Duke qenë se është këngë e njohur, ky detaj bëri që edhe kënga e Trimit të pëlqehet.
“CIGARXHIU I VOGËL”
Versioni origjinal: “Cigarxhiu im i vogël”, Adelina Ismaili, 2000
Ripërpunim nga: Sir-A, 2018
Ka qenë vetë këngëtarja Adelina Ismaili që ka shpërndarë një rixhirim të këngës “Cigarxhiu i vogël” që e ka bërë Sir-A ndërsa i ka uruar artistët e rinj duke u dhënë përkrahje të plotë.
“Një remake fantastik i këngës time #CigarxhiuImIVogel. Sa fatkeq jemi që ende kemi fëmijë cigarexhinj… Artistë të rinj që meritojnë përkrahjen e plotë për punën e tyre, më bëni të ndjehem e përmbushur duke u inspiruar nga unë. Suksese!”, ka shkruar ndër të tjerash Ismaili në llogarinë personale në Facebook.
“FSHATARJA IME”
Versioni origjinal: Sabri Fejzullahu, 2001
Ripërpunim nga: Ermal Fejzullahu dhe Ledri, 2018
Kënga “Fshatarja ime” e sjellë nga Ermal Fejzullahu dhe Ledri, vite më parë është kënduar nga këngëtari i cili pak muaj më parë festoi 50-vjetorin e karrierës së tij, Sabri Fejzullahu.
“ERA”
Versioni origjinal: Grupi Gjurmët, 1984
Ripërpunim nga: MC Kresha, 2015
Kënga “Era” e kënduar dhe kompozuar nga vet grupi i famshëm Gjurmët, u këndua për herë të parë në vitin 1984, dhe sot e kësaj dite mbahet mend si ndër hitet më të mira që i ka rezituar kohës.
Ndërkohë, në fund të vitit 2015, reperi MC Kresha kishte vendosur të sillte një ripërpunim të kësaj kënge, i cili ishte pritur mirë nga publiku dhe fansat e tij.
“SHI BIE NË TIRANË”
Versioni origjinal: Fitnete Tuda dhe Vlera, 1998
Ripërpunim nga: Eni Koçi dhe Genc Prelvukaj, 2017
Të gjithë e kujtojnë këngën e njohur “Shi bie në Tiranë”, cila ishte kënduar nga Fitnete Tuda dhe Vlera Kastrati në Festivalin e Këngës në Radio Televizionin Shqiptar, në vitin 1998.
Një version tjetër i kësaj kënge erdhi në vitin 2017 nga këngëtarët Eni Koçi dhe Genc Prelvukaj, pak muaj pasi ata kishin bërë të ditur edhe lidhjen e tyre.
“JAM DEH ME RAKI”
Versioni origjinal: Shkëlzen Jetishi
Ripërpunim nga: Gent Fatali, 2017
Kënga “Jam deh me raki” është kënduar shumë në odat burrërore e dasma të ndryshme në Kosovë. Madje, kjo këngë shquhet si njëra ndër hitet më të mëdha në karrierën e këngëtarit nga Gjakova, Shkëlzen Jetishi – Xeni.
Kënga “Jam deh me raki” u hyri në qejf edhe të rinjve, kur në vitin 2017, artisti i ri Gent Fatali solli një ripërpunim të saj në një version më interesant.
“SIMPATIA”
Versioni origjinal: Edona Llalloshi dhe Memli Krasniqi, 1998
Ripërpunim nga: Dhurata Dora dhe Lumi B, 2017
Kënga “Simpatia” e këngëtarëve Edona Llalloshi dhe Memli Krasniqi kishte ardhur si një hit i bukur për adoleshentët e vitit 1998. Një tekst dashurie me një këngë të bukur melodioze bëri që kjo këngë të bëhet “Simpatia” e të gjithë të rinjve.
Afro 19 vite më vonë, kjo këngë do të vinte si një ripërpunim i bukur nga dyshja Dhurata Dora dhe Lumi B, ku ky i fundit e pati më lehtë marrjen e të drejtave autoriale, ngase njëri nga interpretuesit, pikërisht Memli, është baxhanaku i tij.
“E DEHUN”
Versioni origjinal: “E dehun jam” , Nexhmije Pagarusha, 1974
Ripërpunim nga: Era Istrefi dhe Mixey, 2014
Kënga “E dehun” shquhet si njëra ndër këngët më të mira në karrierën e bilbilit të këngës shqipe – Nexhmije Pagarusha. Kjo këngë është bërë valsi i shumë të dashuruarve, ndërsa edhe sot është e pëlqyeshme për tekstin dhe zhanrin muzikor.
Në vitin 2014, ishte këngëtarja Era Istrefi e cila solli një ripërpunim të kësaj kënge në një version krejt ndryshe, me çka kishte arritur të pëlqehet në masë të madhe nga publiku. Realizimin e këtij përpunimi, këngëtarja Istrefi e kishte bërë në studion e producentit Mixey, në “Authentic Entertainment”.
“HATIXHE”
Versioni origjinal: ” Moj Hatixhe, n`shami t`kuqe”, Hamide Sadiku, 1971
Ripërpunim nga: Capital T dhe Mixey, 2017
“Moj Hatixhe” është kënga e cila është kënduar në shumë dasma e ahengje të ndryshme në vitet 70-80. Kjo këngë është interpretuar nga Hamide Sadiku me instrumentin e vjetër popullor, defin.
Askujt nuk do t’ia priste mendja që një këngë e tillë do të bëhej hit në vitin 2017, e krejt kjo falë ripërpunimit që sollën dyshja e label-it “Authentic Entertainment”, Capital T dhe Mixey. Në verën e vitit 2017 kjo ishte ndër hitet e padiskutueshme, e cila pushtoi diskotekat shqiptare.
