Mbi 2 miliardë lekë u kanë paguar qytetarëve shqiptarë shoqëritë e sigurimeve në Shqipëri për 3-mujorin e parë të këtij viti. Sipas të dhënave zyrtare të publikuara nga Autoriteti i Mbikqyrjes Financiare për periudhën janar-mars 2021, nga totali i dëmeve të paguara, pjesën më të madhe e ka paguar kompania SIGAL Uniqa Group Austria që është edhe kompania më e madhe në Shqipëri, me mbi 525 milionë lekë.
Sipas AMF, për 3-mujorin e parë të këtij viti, krahas tendencës në rritje të primeve bruto të sigurimeve, pozitive kanë qenë edhe pagesa e dëmeve pezull. Shoqëritë e sigurimeve të Jo-Jetës kanë paguar 6.6 miliardë lekë ose 14.2% më shumë se janar -mars 2020, duke i reduktuar kështu ndjeshëm dëmet pezull. Ka qenë sërish Sigal Uniqa Group Austria kontribuesja më e madhe në reduktimin e dëmeve pezull, duke paguar pjesën më të madhe të tyre.
Pas efektit të krizës nga pandemia e Covid 19, tregu i sigurimeve duket se po i rikthehet normalitetit, duke njohur një rritje të primeve bruto me 12.52% më shumë se 3-mujori i parë i vitit 2020, kohë kur tregu i sigurimeve ishte një nga më të goditurit për shkak të mbylljes totale të vendit si pasojë e Covid dhe pati rënie të ndjeshme të primeve.



