E mërkurë, 18 nëntor 2026

Rubrikat

Mbështet Limit.al

Midis varrezave të Dëshmorëve

Nga Adem Gashi – Kosovë

i shoh një nga një tabelat prej mermeri e druri
emrin e mbiemrin
vitin e lindjes një vizë në mes vitin e rënies
viza e të jetuarit
o sa e gjatë o sa e shkurtër
të paktët që s’i njoha të shumtët që i njoha
sesi më vjen shushurimë e shurdhër

ka ndërruar tashti dhe kodi i mirësjelljes
s’ka shok e mik e vëlla:
po ç’bëni more ZOTËRINJ matanë
se ne këtej bëjmë hata
kemi mësuar përmendësh shpërfilljen harresën
dhe ngjyrat e vajit të kartëmonedhës

paj, ne edhe mund të mos ju vijmë në vizita
ditëkremteve të dielave a të shtunave
ditëve të përshpirtme ditëve të të shumëve
ose edhe kur vijmë bëjmë rituale oportune
veçse mbretëria juaj e qetë shpesh na trazon
ne të gjallëve të humburve

një pllakë druri a guri një emër mbiemër
me një vizë në mes
juve që ju njoha juve që s’ju njoha
thjesht erdha t’ju përshëndes
juve që dhatë dëshminë e kuptimit të rrojtjes

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Kulturë