E mërkurë, 18 nëntor 2026

Rubrikat

Mbështet Limit.al

Ku shkuan xhelatët

Nga Vullnet MATO – Sarandë

Ku shkuan xhelatët, që ngritën kurthet me hafije
dhe tundën hanxharët e dosjeve nëpër duar?
Ku avulluan si mjegullat, në diell demokracie,
thua, sikur asnjëherë nuk kanë ekzistuar?…

Askush nuk i ka parë të shkojnë gjëkundi,
ata që mbollën eshtra anonime ndër mote,
në bokërrima të fshehta, në zallishte lumi,
që lanë të kullojnë strehëve pikat e lotëve.

Disa thonë se ky vend me kujtesë harrimi,
s’ka pasur xhelatë hanxhari, ndonjëherë,
gjoja viktimat shuheshin vetiu, nga pendimi,
por ne i pamë hanxharët, koka duke prerë!…

Klithmat për hetim, kumbojnë kudo sot,
në të gjitha daullet e çara të veshëve tanë.
Shiritat e ndjesive, na vërtiten në kokë,
nga njëra bobinë e trurit, në tjetrën anë.

Të gjitha mbeturinat relikte të hanxharëve,
rreken të thonë, se këtu s’ka pasur xhelatë,
ndonëse ndjehen kudo rënkimet e të vrarëve,
që nën dheun e rëndë, nuk po gjejnë rehat.

Njollat e gjakut shfaqen, te fjalët përsëritur,
që na skuqin fjalorin, kur i dëgjojmë përditë.
Ne vështrojmë njëri-tjetrin, krejt të habitur:
Ore, xhelatët ishin këtu, apo na kanë bërë sytë!…

Por ka ende të gjallë, që me degë në trashëgimi,
përcjellin frymën lindore, të shekullit njëzetë,
që në aspiratorin e frymëmarrjes së shekullit të ri,
të na rikthejnë frymën azmatike, sërish në jetë;

Ndonëse ishin gjysmë shekulli me hanxhar në dorë,
dhe gjysmës së kombit shqiptar i prenë frymën në fyt,
e qeshura xhelate, ndihet ende në kilometra katror,
pa pendim, pa kërkuar falje, për të shuar çdo genocid.

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Kulturë