E mërkurë, 18 nëntor 2026

Rubrikat

Mbështet Limit.al

Koha shkundet kurrëkund

Trevargsh nga poeti QAZIM  D. SHEHU

Në faqe shkëmbinjsh

dielli hodhi një dorë rreze

pasqyrat u grisën si beze.

+++

Humbi kujtesa e një minuti

Minuti tjetër e fshiu

Fytyra në ajër ngriu.

+++

Uri e ujit përtyp kohën

Memecëri delirante

Zbrazet pa gjyq.

+++

Në paralojë futa një  fjalë,

Ngeci tek rrokja e parë,

Dielli mbi sup m`u var.

+++

Mbeta kësaj ane duke pritë

Mos vjen babai;

Çeli gjethe degë e thatë.

+++

Dheu i bardhë tregon

Thinjat e tokës që plaket

Për ne.

+++

Rrjedhin përrenj malorë

Digat e kujtimeve

Përpara marrin.

+++

Ara e gjyshit dhe e babës

Bëri pronar një tjetër njeri,

Ngopja tek tjetri mori uri…

+++

Guralecët në mot të ngrohtë

Bien mbi lumin e vjedhur

Nga një lot.

+++

Harqe triumfesh të vogla

Ngrihen në histori me kokteje

Rrëzohen sa dal prej dere.

+++

Një fije bari kërkoj

Fre për gjuhën;

Njomësia qesh hidhur

+++

Jam kuturisur njeri i vetëm

Vetmia më sjell

Dyndje shekujsh.

++

Shikimet e tua të mbetura

Në ajrin e ndezur

S`m`i ftohin lulet e etura.

+++

Bishti i kalit vret një mizë

I shigjetllës rrezikun ndjell,

Njeriubisht veten vjell…

+++

Ujëvara shkrihet si loti

I dashurisë në trupin femëror;

Greminat s`kërkojnë theror.

+++

Shelgjet përkunden në zjarr

Të dashurisë, anë përroi,

Helmin terratisën ankthit dashuror.

+++

Ciganët braktisën shelgjet,

Hëna si brisk i dëshpëruar

U pret degët…

+++

Lavde ngrita

Për sytë e tu shprehës

Para një gryke pa lëngun dehës.

+++

Koha shkundet kurrëkund,

Një thes poshtë i vë,

Më pak miell, më shumë krunde lë.

+++

Lëçita e pëshpërita

Një mal me poezi,

Sa e gjërë pëshpërima.

+++

Buzët të rreshkura nga puthja,

Çdo lëng tjetër mbi to

Ledhaton shkrumbin.

+++

Në mëngjes dhe darkë

Me njerëz takohem,

Nga vetja ankohem.

+++

Trillime hapësirash

Rrjedhin kujtimet,

Kurrë s`kanë qenë.

+++

Kripë e mbrëmjes

Në gjellë kujtimesh hidhet;

Sa bajate.

+++

Rruga rrëshqet në përtesë,

Shiritin e vet mbledh

Pa asnjë fytyrë.

+++

Dashuria  rrëmben ditën

E ndërsen  drejt vetëtimash;

Zbutur në litarë shiu.

+++

Çengel i fjalës var,

Imazhe të thyera nga drita,

Kontraste pa errësirë.

++

Në jam, në s`jam, s`e di,

Pa shpjegimin e syve të tu,

Mbeta pezulli.

+++

Në xhunglën urbane s`i vras

Mizat e plogështisë;

Tigri i ulërin mërzisë.

+++

Në qerpikun e dikujt

Syri i natës mbyllet;

Na ngushëllojnë yjet.

++

Je diell që ngroh

Hapësira të tjera

Hithra vegjetimi dehen.

+++

Ulërima ujqërish

Në artopolante politikanësh

Ëmbëlsojnë egërsinë.

+++

Turravrap shkon

Majës së shikimit tim

S`dihet kur do biesh.

+++

Zallishte e mjerë

Gurët shkrofëtijnë

Fosile kuajsh.

++

Lopa me gjuhë mbështolli

Një letër të harruar,

Bari pikoi fjalët.

++

Trishtimet s`kanë gojë

Vetëm brima hapin

Mola të padukshme

++

Kosa mbi bar qesh

Për prerjen e barit

Dridhet dorë e kostarit.

+++

E marr shikimin tënd

E ngjyros në brendësi,

Ngjyrat i vjedh tjetër dashuri.

+++

Mendja për tek vendlindja

Bredh përgjysmë,

Gjysmën tjetër e trishtojnë prindërit.

+++

Jetojmë në kohë të bukura

Na injektojnë lumturinë

Mundësitë e pamundura.

+++

Njeriun e dua të zbrazët

Me frymë librash ta mbush

Rekuim dritash pa qetësi.

+++

Zemra ime shqetësuar

Nga rrotullim i syrit,

Dridhet nga lëvizja.

+++

Filiz i pyllit zemërak

Në shtatin tënd mbiu,

Nuk gjeti dru të denjë.

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Kulturë