Në Shqipëri po zhvillohen zgjedhjet e nënta pluraliste. Sipas autoriteteve për mbarëvajtjen e tyre po kujdesen 7.500 policë.
Sot zhvillohen zgjedhjet e nënta pluraliste në Shqipëri. Këto përkojnë me një vit jubile, sepse para 30 vjetësh, Shqipëria organizoi zgjedhjet e para pluraliste.

Për shkak të pandemisë fushata zgjedhore u zhvillua pa shumë inskenime të me mijëra vetë, me slogane buçitëse politike dhe muzikë për të ndezur emocionet. Në vend të kësaj inskenimet kaluan në kanalet e mediave sociale ku doli sërish në pah armiqësia politike dhe denigrimi i rivalit politik, që mjegullojnë faktet dhe argumentat.

Kryeministri socialist, Edi Rama kërkon një mandat të tretë, kjo do të ishte një risi në Shqipëri, pasi asnjë parti nuk e ka arritur këtë më parë në Shqipëri.




