Presidenti rus vazhdon të kontestojë Pavarësinë e Kosovës
Në konferencën për shtyp të fundvitit e cila zgjati për rreth 5 orë, kreu i Kremlinit Vladimir Putin deklaroi se Krimeja u bë pjesë e Rusisë si rezultat i referendumit popullor, ndryshe nga Kosova ku thjesht votoi parlamenti. Sipas presidentit rus, Perëndimi e pranoi ndarjen e Kosovës, ndërsa për banorët e Krimesë vendosi sanksione.
“Unë mbaj përgjegjësi për atë që ndodh me Rusinë dhe njerëzit e saj, duke përfshirë edhe kthimin e Krimesë në Federatën Ruse. Kjo u bë me pëlqimin e popullit të Krimesë. Në Kosovë, parlamenti mori një vendim te njëanshëm për pavarësi dhe Perëndimi menjëherë reagoi se ishte vendim i drejtë dhe demokratik. Njerëzit në Krime u shprehën në referendum dhe votuan. Unë dua t’ju kujtoj se demokracia është sundimi i njerëzve. Disa sanksione janë marrë kundër banorëve të Krimesë? Nëse në perëndim flasin për “aneksim”, ata nuk kanë faj për asgjë, pse duhet të ndëshkohen? Dhe nëse nuk ishte një aneksim, por rezultat i votës së tyre, atëherë duhet të pranojmë se kjo ishte një ushtrim i demokracisë dhe nuk do t’i lëmë ata vetëm”.



