E mërkurë, 18 nëntor 2026

Rubrikat

Mbështet Limit.al

OKB voton rezolutën: Rusia të dëmshpërblejë Ukrainën për dëmet e luftës

Asambleja e Përgjithshme e OKB-së miratoi sot një rezolutë, nëpërmjet së cilës kërkohet që Rusia, duke pushtuar Ukrainën, të shpallet përgjegjëse për shkeljen e ligjit ndërkombëtar dhe për pasojë të paguajë edhe dëmshpërblimet për dëmet e luftës.

Gjatë votimit në OKB, ku bëjnë pjesë 193 shtete anëtare, 94 votuan pro, 14 kundër, ndërsa 73 shtete abstenuan.

Shqipëria votoi pro kësaj rezolute, ndërsa Serbia abstenoi në votën e saj, duke konfirmuar edhe njëherë afërsinë me Rusinë duke qenë shteti i vetëm ballkanik që refuzon të dënojë agresionin e paprovokuar rus në Ukrainë.

Kjo rezolutë pati një nivel më të ulët mbështetje, krahasuar me 5 rezolutat e tjera për Ukrainën, të miratuara nga Asambleja e Përgjithshme e OKB-së, që nga nisja e pushtimit të Ukrainës nga Rusia më 24 shkurt 2022.

Rezoluta pasqyron nevojën për të krijuar “një mekanizëm ndërkombëtar për kompensimin e dëmeve”, që rrjedhin nga “veprimet e gabuara” të Rusisë kundër Ukrainës.

Rezoluta rekomandon që vendet anëtare të Asamblesë, në bashkëpunim me Ukrainën, të krijojnë “një regjistër ndërkombëtar” për të dokumentuar pretendimet dhe informacionet mbi dëmet, humbjet ose dëmtimet e ukrainasve dhe qeverisë, të shkaktuar nga Rusia.

E drejta e vetos së Rusisë në Këshillin e Sigurimit prej 15 anëtarësh ka bllokuar organin më të fuqishëm të OKB-së, që të ndërmarrë veprime, që kur Presidenti Vladimir Putin urdhëroi pushtimin. Por vetoja nuk vlen gjatë votimeve në Asamblenë e Përgjithshme të OKB-së.

Ndryshe nga rezolutat e Këshillit të Sigurimit, rezolutat e Asamblesë së Përgjithshme të OKB-së, nuk janë ligjërisht detyruese, por ato, gjithsesi, pasqyrojnë opinionin botëror, i cili ka qenë kundër veprimeve ushtarake të Rusisë ndaj Ukrainës.

Të fundit

  1. Opinione

    Trazira në Europë, aty ku Perëndimi i trazuar takohet me Lindjen paqësore
  2. Aktualitet

    Turizmi botëror drejt rekordit: 1.57 miliardë mbërritje më 2026
  3. Bota

    BE – Nga 1 nëntori tarifë e re prej 2 Eurosh për blerjet online nga jashtë Unionit
  4. Bota

    NASA – Pas 22 vitesh në hapësirë, teleskopi Swift drejt rikthimit në Tokë
  5. Shkencë dhe zbulime

    Energjia e erës dhe biodiversiteti: Miliona lakuriqë nate vdesin nga turbinat

Më shumë nga Aktualitet