Koreja e Jugut tha të shtunën se ka arritur qëllimin e saj, që të vaksinojë plotësisht kundër koronavirusit 70 për qind të popullatës prej 52 milionë banorësh, duke i hapur rrugë kthimit në normalitet gjatë muajit të ardhshëm.
Koreja e Jugut nisi vaksinimin kundër koronavirusit në fund të muajit shkurt, dhe vaksinimi i 70 për qind të popullatës, apo rreth 36 milionë banorëve, u arrit në orët e vona të së premtes, tha Agjencia për Kontrollin dhe Parandalimin e Sëmundjeve të këtij shteti.
Nisja e fushatës së vaksinimit në Korenë e Jugut ishte me vështirësi, për shkak të vonesave të dërgesave me vaksina, por ky shtet, pas tejkalimit të këtyre problemeve përshpejtoi fushatën e imunizimit, edhe falë pranimit nga publiku që të vaksinohet.



