/ATSH-DPA/- Turqia rihapi sot një nga pikëkalimet e saj kufitare me Sirinë për udhëtimin civil pas një mbylljeje 12-vjeçare, raportoi media shtetërore, në një tjetër shenjë të përmirësimit të lidhjeve midis Ankarasë dhe Damaskut.
Mbajtësit e pasaportave tani mund të kalojnë nëpër portën Akçakale në provincën juglindore të Sanliurfa të Turqisë”, raportoi “Anadolu”.
“Kalimi u mbyll për trafikun civil në vitin 2014, për shkak të luftës civile në Siri dhe që atëherë ishte përdorur vetëm për shpërndarjen e ndihmës humanitare”, tha kryetari i bashkisë së Akçakales, Abdulhakim Ayhan, i partisë në pushtet AK.
Akçakale gjithashtu shërbeu si një pikë nisjeje për operacionin ushtarak të Turqisë në vitin 2019 kundër milicive kurde në Sirinë veriore.
Matanë kufirit shtrihet qyteti sirian Tal-Abyad, i administruar aktualisht nga qeveria kalimtare e Sirisë nën drejtimin e presidentit Ahmed al-Sharaa.
Marrëdhëniet midis Turqisë dhe Sirisë kanë qenë të tendosura që nga fillimi i luftës civile siriane në vitin 2011.
Vitin pasardhës, Ankaraja ndërpreu marrëdhëniet diplomatike me qeverinë siriane.
Që nga përmbysja e ish-presidentit sirian Bashar al-Assad në fund të vitit 2024, marrëdhëniet midis Ankarasë dhe Damaskut janë përmirësuar.
Turqia rihapi ambasadën e saj në Damask. Ekonomikisht, të dy vendet kanë rilidhur kontakte më të ngushta që nga ndryshimi i pushtetit në Siri.
Sipas “Anadolu”, eksportet turke në Siri arritën në më shumë se 2,5 miliardë dollarë në vitin 2025.
