Shpresat e një aktiviteti “të mundësuar nga vaksinat” gjatë këtij viti kanë çuar Fondin Monetar Ndërkombëtar (FMN) të përditësojë parashikimin e tij për rritjen ekonomisë globale në vitin 2021.

Parashikimi i ri i FMN-së është për një rritje të ekonomisë globale prej 5.5% gjatë këtij viti dhe 4.2% në vitin 2022.

Për Mbretërinë e Bashkuar, parashikimi i rritjes për këtë vit është ulur në 4.5%. Sidoqoftë, FMN tani mendon që tkurrja e saj vitin e kaluar nuk ishte aq e thellë sa e kishte vlerësuar më parë.

FMN tha se, tkurrja e vlerësuar prej 10% në Mbretërinë e Bashkuar ishte akoma më e madhja në G7, shtatë ekonomive kryesore në botë.

Përmirësimi global pasqyron, përveç zhvillimeve të vaksinave, edhe masat e shpenzimeve të ndërmarra nga qeveritë në fund të vitit të kaluar, veçanërisht në Shtetet e Bashkuara dhe Japoni. Të dyja këtyre vendeve iu është dhënë një përmirësim i ndjeshëm në parashikimin e ri.

Këto dy ekonomi parashikohet të kthehen në nivelet e aktivitetit të para-pandemisë, që është në fund të vitit 2019, më vonë gjatë këtij viti.

Nga ana tjetër, FMN thotë se veprimtaria në Britani dhe në Eurozonë ka të ngjarë të mbetet nën nivelet para-pandemike deri në vitin 2022.

FMN gjithashtu pret një performancë të ndryshme midis vendeve në zhvillim. Frenimi i virusit nga Kina dhe investimet publike kanë ndihmuar në rikuperimin e fortë. Kina arriti të shmangte një tkurrje ekonomike vitin e kaluar, megjithëse shkalla e rritjes së saj ishte shumë e ulët nga vitet e mëparshme.

Më e vështirë do të jetë për ekonomitë në zhvillim që mbështeten në turizëm ose në shitjen e naftës. Kërkesa për të dyja shërbimet është goditur shumë nga pandemia dhe ka të ngjarë të kthehet në normalitet më ngadalë.

Vendet e pasura pritet që në pjesën më të madhe të rikuperohen më shpejt sesa vendet në zhvillim. Kjo pasqyron aksesin e tyre më të shpejtë në vaksina dhe faktin që ata kanë qenë në gjendje të sigurojnë atë që kryekonomistja e FMN-së Gita Gopinath e quan mbështetje më të zgjeruar.

Pavarësisht nga lajmet e mira për zhvillimet e vaksinave, raporti vëren shqetësime të vazhdueshme, si rritja e infeksioneve në fund të vitit 2020 në disa vende, bllokimet e rinovuara dhe çështjet logjistike me shpërndarjen e vaksinave. Raporti thotë se politikat agresive nga qeveritë dhe bankat qendrore kanë ndihmuar në parandalimin e rezultateve edhe më të këqija. Ai thotë se këto masa duhet të qëndrojnë derisa vaksinat të mbështesin fillimin e një kthimi në normalitet./BBC