Publikim nga portali
Që kur ka lindur dielli mbi kombin tonë, jemi krenuar gjithmonë për vlerat e larta morale, që çdo shqiptar mbart thellë në veten e tij. Trimëria, burrëria, besnikëria për të përmendur vetëm këto janë për ne më shumë se fjalë. Ato janë thelbi i identitetit tonë. Janë pasqyra, përballë së cilës gjykojmë veten dhe xhami, nëpërmjet të cilit shohim bashkëkombasit tanë.
Vendi po përballet me një sfidë të panjohur më parë në historinë e tij. Një virus i quajtur COVID-19, ose Coronavirus, kërcënon jetët tona dhe në veçanti jetën e njerëzve që na kanë rritur e ushqyer me dashuri. Ata sot, të moshuar, janë përgjegjësia e ne të gjithëve.
Ky virus na ka ngujuar ne shtëpi. Edhe pse i padukshëm, ai ka zbarkuar si Bajloz në brigjet, në fushat e në malet e Shqipërisë. I pamëshirshëm, ka çekuilibruar shtetin dhe ekonominë në permasa, që as në makthin më të madh nuk do i kishim menduar.
Virusi e ka fituar betejën e parë. Ai na ka gjunjëzuar, na ka plagosur, na ka trembur… mirëpo, nuk na ka vrarë akoma. Çdo ditë që kalon na dhuron një mundësi të re per t’u ngritur, për t’u përgjigjur siç është në nderin tonë.
Ne ende nuk e kemi kapur këtë mundësi. Si pasojë, çdo ditë e thellon pak më tej krisjen e kombit tonë. Ndërkohë që e gjithë vëmendja është kthyer te funksionimi i institucioneve shtetërore dhe sipërmarrja private, në prapaskenë po luhet nje dramë tjetër.
Pa punë, te çoroditur nga ndryshimet e thella që po pësojnë jetët e tyre, familje të panumërta përjetojnë vështirësi të mëdha ekonomike dhe psikologjike. Sidomos mungesa e shpresës për një të ardhme për femijët rëndon zemrat e prindërve shqiptarë në mbarë vendin.
Nuk mund të kthejmë më kokën tutje përballë këtij fakti. Kjo sfidë nuk është vetëm shëndetësore dhe ekonomike. Ajo është gjithashtu një sfidë qytetërimi.
Cfarë jemi gati të sakrifikojmë për të mbajtur gjallë indin që na lidh si shqiptarë njëri me tjetrin? Çfarë rëndësie u japim vlerave shekullore të kombit tonë?
Bujaria dhe vëllazëria janë vlera themelore të trashëgimisë tonë kombëtare. Po i harruam në sfidën që kemi përpara, kemi shkelur mbi çfarë na bën vërtetë shqiptarë.
Ne nuk mund t’i ndryshojmë politikanët që tallin hallexhinjtë nëpër rrjetet sociale, që ngjisin emrat e tyre në pako ndihmash dhe fytyrat e tyre në kronika televizive të parapërgatitura. Por ne mund të veprojmë për të qenë në lartesinë e idealeve tona.
Pranë çdo njësie vendore të krijohet Qendra e Koordinimit të Fushates për Bamirësi Urgjente Kombëtare (B.U.K.). Kjo fushatë, nëpërmjet mbledhjes dhe shpërndarjes së ndihmave ushqimore dhe produkteve të tjera bazë për jetesën do të forcojë frymën e solidaritetit midis shqiptarëve dhe do të lehtësojë sadopak familjet në nevojë.
Kjo fushatë duhet të ketë si zemër dhe motorr, të gjithë qytetarët shqiptarë, që do të tregohen të gatshëm të ndihmojnë si vullnetarë. Të organizuar në grupe te vogla dhe të përshtatur me kontekstin lokal, detyra e vullnetarëve do të jetë mbledhja e ushqimeve dhe produkteve të tjera bazë pranë bizneseve, tregjeve, supermarkatave, ku jo vetëm të pasurit, por edhe shumë nga qytetarët modestë, që bëjnë blerjet e zakonshme për familjet e tyre, kanë mundësi të dhurojnë një pako makarona, një kile oriz, një shishe vaj në shenjë solidariteti me nevojtarët.
Një sfië si kjo që kemi përballë nuk mund të fitohet pa zemrën e njerëzve. Zemrën e atyre që marrim dhe atyre që japin. Nëse e harrojmë, ndoshta do fitojmë betejën ekonomike dhe shtetërore ndaj koronavirusit por do krisim kombin, sepse do ndikojmë që të zbehen akoma më shumë bujaria dhe vëllazëria, vlera ne themel të indetitetit tonë kombëtar.
Lista e nënshkruesve (sipas rendit alfabetik të mbiemrit)
Flutura Açka
Alda Bardhyli
Afrim Bilali
Besnik Bisha
Anila Bisha
Julian Brahja
Enkel Demi
Ida Gurguri
Flori Haçkaj
Bashkim Hoxha
Erkand Karaj
Genti Kruja
Lutjona Lula
Ramiz Lushaj
Mark Marku
Even Mediu
Dom Gjergj Meta
Taulant Muçollari
Andi Mustafaj
Besnik Mustafaj
Sami Neza
Beti Njuma
Endri Shabani
Ylli Shameti
Orges Shehi
Dhurata Shehri
Aida Shtino
Skerdilaid Sulozeqi
Klaudia Trezhnjeva
Red Vogli
Rudina Xhunga
Renis Zaganjori
