LAVDIA
Me padurim murgjit vrapojnë
Nga manastiri drejt në tempull,
Për kryemurgjër mëtojnë
Me tymin e ëndrrës mjegull.
Portën që rri ndryrë
Zallamahisur hapin,
Njëri tjetrin duke shtyrë
Në ethe të turravrapit.
Dhe s`duan të bëjnë hile
Në padurim tek mësyjnë,
Fshehurazi me kopje kopile
Të hapin drynë.
Në ngutje e lutje bëlbëzojnë
Plot fjalë e përgjërime,
Nga shpirti seç u burojnë
Psallmet me adhurime.
Pse kurorën e lavdisë
Veç kryemurgut ia kanë dhënë
A rrihet jashtë murit të avllisë
Kur tempulli e ka një mëngë?
Kryemurgu kur i dëgjoi
U foli me zë, butësisht:
Në tempull s`hyn kush të dojë
Me çels kopil dashurish….
LIRIA
Kur ti mungoje
Erdh Baraba e solli lirinë.
Vjedhur prej Krishtit
Pa treguar hajninë.
Unë u bëra padron i saj,
Kaq mundësi e liri…,
Sa Judën e Barabanë
I bëra skllevërit e mi…
