2018 do të jetë një vit i veçantë për futbolldashësit. Pas një dekade dominimi absolut të Lionel Messit dhe Cristiano Ronaldos, që kanë marrë pothuajse të gjitha çmimet më të rëndësishme për karrierën e një futbollisti, në 3 dhjetorin e këtij viti pritet të ndodhë ndryshimi.
Luka Modriç, i cili ka marrë tashmë çmimin “Lojtari më i mirë në FIFA”, është kandidati kryesor për të fituar Topin e Artë. Përballë tij, do të jenë konkurrentë të fortë si 19-vjeçari Kylian Mbappe, Neymar dhe Antoine Griezmann- për të mos përmendur Messin dhe Ronaldon që ishte më se e pritshme të ishin pjesë e kandidatëve.
Në listë nuk kishte si të mungonte Eden Hazard. Belgu pati performancën më të mirë individuale në Kupën e Botës “Rusi 2018”, ndërkohë ka shënuar sezonin e kaluar 17 gola për Chelsea-n, teksa e ka nisur me të njëjtën ritëm edhe sezonin e ri, ku në 10 ndeshjet e fundit ka shënuar plot 7 herë. Pjesë e 30-shes është edhe Harry Kane, që fitoi “Këpucën e Artë” në botëror. Ai ka shënuar 41 gola në 48 ndeshje për Spurs sezonin e kaluar, por këtë sezon ka pasur një ritëm paksa më të ngadaltë.



