E mërkurë, 18 nëntor 2026

Rubrikat

Mbështet Limit.al

“Forbes”/ 10 futbollistët më të paguar në botë

Para se të kalonin 24 orë nga lajmi se Cristiano Ronaldo u largua nga Juventus për t’iu bashkuar Manchester United, ylli portugez u bë lojtari me vlerën më të lartë të shitjes në faqen sportive të merchandise Fanatics.

Ai tejkaloi vlerën e shitjes së atletëve të tjerë të famshëm që kanë ndryshuar ekip në vitet e fundit, në mesin e të cilëve Tom Brady (NFL) në 2020-n; LeBron James (NBA) në 2018-n dhe Bryce Harper (MLB) në 2019-n.

Por fitorja e tij më e ëmbël mund të ketë qenë ajo lënies pas të rivalit në futboll, Lionel Messi, i cili vetëm pak javë më parë kishte njoftuar se do të linte Barcelonën për t’iu bashkuar Paris Saint-Germain.

Ky është lloji i forcës së shitjes që lind nga të qenët atleti më i famshëm në botë – me më shumë se gjysmë miliard ndjekës në Facebook (149 milionë), Instagram (344 milionë) dhe Twitter (94,3 milionë) – gjë që e ka ndihmuar të ngjitet në vendin e parë të klasifikimit të Forbes të futbollistëve më të paguar në botë për vitin 2021. (The World’s Highest-Paid Soccer Players 2021).

Fitimi para taksave i Cristiano Ronaldos në sezonin 2021-22 është 125 milionë $, ku 70 milionë $ vijnë nga paga dhe bonusi për rikthimin te Manchester United, ku në përvojën e parë nga viti 2003 në vitin 2009 fitoi tre tituj kampion radhazi në Premier League dhe trofeun e Champions League në vitin 2008.

Pjesa tjetër vjen nga angazhimet personale dhe marrëveshjet sponsorizuese, me marka si Nike, Herbalife, Clear. Portofoli i tij gjithnjë në zgjerim, CR7-branded, përfshin parfume, veshje të brendshme, syze, hotele, palestra etj. Vetëm tre atletë të tjerë sportivë fitojnë më shumë komercialisht: Roger Federer (90 milionë $), LeBron James (65 milionë $) dhe Tiger Woods (60 milionë $).

Dhe Ronaldo, 36 vjeç, nuk po shfaq shenja ngadalësimi, duke vazhduar të lërë pas shumë prej rivalëve në Europë, pjesa më e madhe e të cilëve janë dhjetë vite më të rinj se ai. Ronaldo shënjoi rikthimin në “Old Trafford” duke shënuar dy herë në ndeshjen e parë në rikthimin në “Teatrin e Ëndrrave”. Dhe tashmë ka shënuar katër gola në tre ndeshje të luajtura me Djajtë e Kuq (3 në Premier League dhe 1 në Champions League, ne humbjen me Young Boys).

Rivali i tij, 34-vjeçari Lionel Messi, pas 21 viteve te Barcelona – është transferuar te PSG ku do të paguhet 75 milionë $ në vit këtë sezon. Ylli argjentinas renditet në vendin e dytë në klasifikimin e Forbes, me 110 milionë $. Messi u detyrua të largohet pasi La Liga spanjolle u vuri kufizime shpenzimeve të pagave FC Barcelona, duke detyruar klubin të mbyllë marrëveshjen me 6 herë futbollistin më të mirë të vitit, i cili ka luajtur te Barça që kur ishte 13 vjeç.

Në total, fitimi para taksave i dhjetë futbollistëve më të paguar në botë pritet të arrijë 585 milionë $ në këtë sezon, krahasuar me 570 milionë $ vitin e kaluar. Pagat dhe bonuset përbëjnë pjesën më të madhe të totalit – 415 milionë $ – në rritje modeste 2.6% krahasuar me vitin e kaluar, duke qenë se pjesa më e madhe e klubeve vijojnë të jenë të kujdesshëm përballë paqartësive të pandemisë.

Në maj, UEFA, organi qeverisës i futbollit europian, publikoi një raport ku shkruhej se klubet e mëdha po përballeshin me humbje të larta të ardhurash të lidhura me pandeminë, prej 8.5 miliardë $, duke ndikuar në lëvizjen e lojtarëve më të rëndësishëm.

PSG zotëron tre nga pesë futbollistët më të paguar në botë, duke përfshirë edhe Neymar, 29 vjeç, i treti në klasifikim, me 98 milionë $ dhe Kylian Mbappe, 22 vjeç, i katërti në klasifikim, me 43 milionë $. Futbollisti i Liverpool, Mohamed Salah, 29 vjeç, mbyll “top 5” me 41 milionë $.

Këtë vit, 37-vjeçari Andres Iniesta është i vetmi futbollist i cili luan në një skuadër joeuropiane, duke u renditur i shtati, me 35 milionë $, pasi firmosi një rinovim të kontratës me dy vjet me klubin Vissel Kobe në Japoni, që kur u largua nga Barcelona në 2018-n.

Për të përpiluar klasifikimin, Forbes bisedoi me klubet, agjentët e klubeve, sponsorët komercialë dhe ekspertë të futbollit në mbarë botën. Shifrat janë në Dollarë Amerikanë, duke përdorur kursin aktual të këmbimit dhe duke përfshirë fitimin para taksave për sezonin 2021-22, bonuset dhe të ardhurat nga sponsorizimet. Komisionet e transferimit përjashtohen.

Forbes / Klasifikimi i 10 futbollistëve më të paguar në botë për vitin 2021

  1. Cristiano Ronaldo, Manchester United, 125 milionë $
  2. Lionel Messi, Paris Saint-Germain, 110 milionë $
  3. Neymar, Paris Saint-Germain, 95 milionë $
  4. Kylian Mbappe, Paris Saint-Germain, 43 milionë $
  5. Mohamed Salah, Liverpool, 41 milionë $
  6. Robert Lewandowski, Bayern Munich, 35 milionë $
  7. Andres Iniesta, Vissel Kobe, 35 milionë $
  8. Paul Pogba, Manchester United, 34 milionë $
  9. Gareth Bale, Real Madrid, 32 milionë $
  10. Eden Hazard, Real Madrid, 29 milionë $

/ Forbes

Foto: MARTIN RICKETT/GETTY IMAGES, ANP SPORT/GETTY IMAGES

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Sport