E mërkurë, 18 nëntor 2026

Rubrikat

Mbështet Limit.al

Përse u shkërmoq LDK? – Shkruan: Agron Sulshabanaj

Nuk ka kaluar as një javë nga zhvillimi i zgjedhjeve në Kosovë, kur sapo kaloj kufirin në Morinë, shikoj posterat e fushatës, mes tyre edhe dyshen “Osmani-Kurti”. Përtej rezultatit të zgjedhjeve, për të cilin unë i komplimentoj, përveç kësaj nuk më ngjet fotoja. Jo, se në mimikën e tyre nuk gjen jetë e shpresë, përtej nurit të fitores, qofsha ideologjikisht i gabuar, nuk besoj se shkon ekstremi i majtë me qendrën e djathtë.

Respekt për verdiktin e datës 15 shkurt të qytetarëve të Kosovës, shumë respekt për klasën politike për qasjen e tyre gjatë procesit zgjedhor deri me njohjen e rezultatit. Udhëtoj edhe pak kilometra dhe para syve me del posti i kryeministrit në detyrë zotit Hoti, ku përmes fotos shpreh keqardhjen, jo për rezultatin e partisë së tij, pasi këtë rezultat e kam parashikuar në një shkrim të para disa ditëve tek portali “27.al”.

Keqardhje te madhe ndjej edhe për Lidhjen Demokratike të Kosovës, për LDK-në e Dr.Rugovës, të Fehmi Aganit, të Nexhat Dacit…, për LDK-në e presidentit Sejdiu, të Anton Qunit, për…., e për shumë e shumë përfaqësues të tjerë të kësaj force demokratike që nga themelimi i saj në kushte pamundësie, e deri në ditët e sotme.

Ndoshta jam subjektiv, por deri pas luftës së UÇK-së, për mua politika në Kosovë ka qënë LDK-ja. Kjo për rolin “Gandh”-esk të Dr. Rugovës e bashkëpunëtorëve të tij të ngushtë pas viteve 90’.

I nderuar zoti Hoti! LDK nuk u shkërmoq me 14 shkurt, kur ti si i mandatuari i kësaj force politike për kryeministër, e ule atë në 13 %, së bashku me presidentin Pacolli.

LDK nuk u shkërmoq as kur u mandatove para disa vitesh për herë të parë për kryeministër, e kryeministër u bë Isa, pasi rezultatin tënd të dobët të atij viti, e riparoi zonja Osmani në tetor të 2019-ës, si askush më parë në LDK pas vdekjes së Rugovës.

LDK nuk u shkërmoq as kur nënkryetari i saj u tregua i zgjuar e shkoi i pari i Gjilanit (i cili gëzon respekt), nuk u shkërmoq as kur i pari i Podujevës u bë homolog me kryetarin e Gjilanit në parti, i cili nuk mbajti përgjegjësi politike kur e humbi Podujevën para disa muajve.

LDK-në nuk e shkërmoqën as politikanët e pasluftës me gjithë diversionet e tyre deri në veprimet ekstreme ndaj LDK-së, nuk u shkërmoq as nga seanca e datës 25 mars 2020 të Kuvendit të Kosovës. LDK-në nuk e shkërmoqi as largimi momental (besoj do rikthehet) i Vjosës, edhe përse përtej largimit të saj që mua s’më pëlqeu, disa nga ju në parti (jo ju) e detyruat, ajo nuk bëri mirë. Shumë shpejt do të rikthehet në familjen e vet politike.

Por i nderuar kryeministër, LDK me syrin tim ka disa vite që është shkërmoqur, ti këtë e di fort mirë, besoj edhe e ke vuajtur, por mos e thuaj ti, se po ta them une se kur u shkërmoq LDK-ja:

LDK-ja u shkërmoq atë ditë të zezë të Kuvendit të saj, kur presidentin Sejdiu e nxorët nga dritarja, kur maskarenjtë e LDK-së kapën hunjtë, shkarkuan Sejdiun e sollën Isën.

Zoti Hoti, ditën e hunjve në Prishtinë (në Kuvendin e LDK-së), duke e përcjellë nga shtëpia ime në Tiranë, ndjeva dhimbje, trishtim, zhgënjim dhe në inkoshiencën time e parashikova 14 shkurtin. Nuk më erdhi mirë që të ngeli ty në dorë.

As marrja e përgjegjësisë nga ana jote e rezultatit, as dorëheqja e Isës nuk e ngushëllon LDK-në. Me sa të kam ndjekur në politikë, ti ke energji, mblidhe Kuvendin, mos prit 60 ditë (sipas statutit), merru vesh me të parin e Gjilanit, Vjosa nuk vjen për momentin, ik në parlament e bëj opozitë dinjitoze, ringrije LDK-në, e në vjeshtë në zgjedhjet lokale minimizoje shkërmoqjen, shëroja plagët, ndaloja hemoragjinë.

Respektoje kryetarin e Kuvendit se president bëhet Ramushi, këte e pohoi pas zgjedhjeve Albini, duke cituar sloganin e tij të kahershëm, e të Ramushit në fushatë për bashkim kombëtar.

E për fund, Albini me Ramushin të rrinë të qetë, se përtej se e kanë mik Ramsin, ai e urren togfjalëshin “Bashkim Kombëtar” e hiç kosovarët nuk i don.

Së fundmi, zoti Hoti, ke një meritë për aq sa ka përgjegjësi qeveria në zgjedhje për mbështetjen dhe zhvillimin e tyre, këtë implementoje edhe në kuvendin e afërm të LDK-së, që të mos përsëritet dita e hunjve, apo cenimi i rezultatit të kuvendit, duke ua garantuar votën delegatëve të kuvendit si themeli i demokracisë.

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Aktualitet

    Prishtina shtrenjton parkimin, deri në 20 Euro për një ditë në qendër
  3. Aktualitet

    Shqipëria dhe Kosova forcojnë bashkëpunimin për shpëtimin në male
  4. Aktualitet

    Bota përballet me mungesë financimi prej 30 trilionë Eurosh
  5. Aktualitet

    Turizmi botëror drejt rekordit: 1.57 miliardë mbërritje më 2026

Më shumë nga Zëra