E mërkurë, 18 nëntor 2026

Rubrikat

Mbështet Limit.al

Kinezëritë e Rinasit dhe pafuqia e ministrit të Diasporës

Nga Petrit Kuçana

Të mezidallueshëm janë flamujt kinez në mes të atyre Kuq e Zi në aeroportin e vetëm shqiptar. Poshtë tyre si replike, një avion i ngjyrosur vrullshëm me ngjyrat kombëtare, që duket se personifikon bjerrjen deri në venitje të Aeroportit tashmë të “dorëzuar” kinezëve.

Kalon çdo terminologji “kinezëria” me këtë aeroport, i gjithë-pranuar si më i shtrenjti i rajonit, ndër më të shtrenjtit në Evropë, e çoç del ndonjë lajm se t paktën këtu “rezervohen” çmimet tre herë më të larta se aeroportet e rajonit. Një lajm thuajse i kobshëm, por krejt amorf, që rrjedh ashtu në mesin e lajmeve ditore dhe asnjë çudi nuk ndodh, as brenda ditës; thjesht lajm që më së shumti shkakton neveritje së paku tek mërgimtarët, ata që bartin në kurrizet e tyre halleshumë edhe këtë “dhuratë” shqiptaro-kineze.

Janë mërgimtarët ata që e përballojnë sa hyjnë në tokën e rrënjëve, nga ku nuk mund të shkulen,  ata që masin çdo cent të biletës, pasi nuk kanë gjetur të tjera hapësira dhe mundësi nga aeroportet fqinjë (kryesisht ata që e kanë kohën e kufizuar). Krejt e pabesueshme mund të duket për shumëkënd që shumë mërgimtarë sidomos nga veriu i Shqipërisë ka vite e vite që nuk kanë qenë në Tiranë, pasi Podgorica mbetet porta tyre e hyrjes, në mos Tivati i krahasueshëm me ndonjë “petrol station” nga ata luksozët në Shqipëri.

E njëjta gjë ndodh me Shkupin apo aeroportet greke, e Rinasi vjen më shumë si mallkim.

A është Rinasi personifikim i “përkujdesjes” së shtetit shqiptar ndaj mërgimtarëve?

Bash e tejkaluar del kjo pyetje, pasi mërgimtarët shqiptarë, si jetimë të paepur, nuk kanë përfaqësues, nuk kanë mbrojtje dhe nuk kanë peshë, pasi qeveritarët nuk e kanë parë “të arsyeshme” t’u japin atyre të drejtën e votës. Thjesht para faktit të kryer, që duket sikur kumbon pasthirrma se ky është aeroporti, këto janë çmimet në daç hajdeni në daç thyeni qafën nëpër aeroportet e tjera… dhe kjo është Shqipëria se autoriteti i konkurencën është diku mes letrash, si autoritet që mbron shqiptarët nga abuzimet që në fakt reflekton si grup njerëzish që firmosin diku ndonjë pagë dhe çdo lloj organizmi tjetër mbetet i pazëshëm, i pashpirtshëm në hendekun e madh të çmimeve diferencuese mes aeroportit të Rinasit dhe vendeve të tjera të rajonit.

Duket e pamundur të gjendet ndonjë ent rregullator, ndokush që mund t’i bjerë kokë pikëpyetje e thjeshtë dhe e madhe se pse Rinasi është tre herë më i shtrenjtë se aeroportet e tjera të rajonit? Aq më pak të gjenden shifrat e humbjeve që i vijnë mëmëdheut nga kinezëritë e Rinasit. Pak e vështirë për të gjetur edhe numrin e mërgimtarëve shqiptarë që vijnë nga Mali i Zi, Maqedonia apo Greqia, pasi ata thjesht numërohen si turistë.

Mbetet një pikëpyetje që as Ministri i shtetit për Diasporën nuk i përgjigjet dot. Madje këtu në Londër u shpreh se ndjehej i turpëruar dhe se kishte marrë vesh se shumë shqiptarë shkojnë nga Londra në Mal të Zi dhe kaq. Majko s’mundet. E kush dreqin mundet? Kush mund të mbroje interesat e rreth gjysmës së popullsisë shqiptare që jeton jashtë territorit të Republikës?

Kaq retorike duken këto pikëpyetje për pushtetarët që se kanë idenë e çmimeve të biletave, saqë çdo ligjërim i tyre për mërgimtarët ngjallin vetëm neveri, siç mund të jetë edhe përpjekja për zgjedhjen e komisarëve të diasporës, ndërkohë që kinezëritë në Rinas vazhdojnë, gllabërueshëm..

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Aktualitet

    Prishtina shtrenjton parkimin, deri në 20 Euro për një ditë në qendër
  3. Aktualitet

    Shqipëria dhe Kosova forcojnë bashkëpunimin për shpëtimin në male
  4. Aktualitet

    Bota përballet me mungesë financimi prej 30 trilionë Eurosh
  5. Aktualitet

    Turizmi botëror drejt rekordit: 1.57 miliardë mbërritje më 2026

Më shumë nga Zëra