E mërkurë, 18 nëntor 2026

Rubrikat

Mbështet Limit.al

Edi Rama i Madh dhe Shqipëria e Vogël…!

Nga Ramiz LUSHAJ

Flamur Noka – nji nga figurat emblematike të PD-së, ish ministër i Brendshëm, deputet i Qarkut të Kukësit (i vetmi qark i djathtë) para 40 minutave e hodhi statusin e mëposhtëm në faqen e tij në facebook. Nuk kemi vrejtje për statusin e tij edhe në koft se statusi ka vrejtje për vet Flamur Nokën.

Çështja trajtohet ndryshe: Flamur Noka në statusin e tij me 56 fjalë gjithsej e me ma shumë se 30 gabime jo vetëm drejtëshkrimore ia shkruan me germa nistore të mëdha emrin e mbiemrin “Edi Rama”, ndërsa emrin tonë të përbashkët, kryefjalën e identitetit tonë kombëtar ‘Shqipëri” e niston me germë të vogël.

Shumkush do ta keqvlerësonte e ndëshkonte botnisht një akt të tillë shkrimor të një politikanI të tillë kariere e të kalibrit të lartë kur e shënon me të vogël emrin e Shqipërisë tonë të shenjtë. Unë nuk kam pá ndokund në facebook që Sali Berisha, Ilir Meta, Edi Rama, Bujar Nishani…e Leka Zogu i Parë të shkruajnë emnin e Shqipërisë me të vogël.

Sikur këto fjalë Flamur Noka t’i kishte të shkruara bukurshkrim me dorën e tij mbi letrën e bardhë, atëherit ato do të na zbulonin shumçka nga personaliteti i tij, nga karakteri i tij. Po, ai, kësaj here, si ngahera, i ka të shkrueme në faqe botës e në kuti të faqes së tij në facebook. Po dhe këto fjalë flasin shumë për politikanin, deputetin e qytetarin Flamur Noka. Ma e pakta duket se nuk e mirë vlerëson elektoratin e lexuesin e tij në facebook dhe tjetra, prapë e keqe dhe ma e keqja, e mbivlerëson dhe në drejtshkrim ma shumë Edi Ramën se Shqipërinë.

Mos kujtoni se ashtu, krejt rastësisht, i paska shkrue emër e mbiemër Edi Ramës me të madhe dhe Shqipërinë e tij/tonë me të vogël. Ndoshta nuk po e randojmë aq shumë sa t’i thona se Shqipërinë e vlerëson kaq të Vogël, po nuk do të gabonim po të thoshim se Edi Ramën e vlerëson të Madh.

Atij, politikanit e deputetit Flamur Noka, (me ose pa dashje) Edi Rama i duket i madh, ma i madh nga ç’mund ta kujtojnë dhe vet të majtët kundërshtarë të tij, saqë dhe emër e mbiemër do me ia skalit me të mëdha e Shqipërisë me të vogël.

A e keni pá se “çka i ban në tribunën e Parlamentit” kryeministrit Edi Rama e njiherit kryetar i PS-së, partisë së majtë në pushtet qeverisës?! Don me e zvoglue, me e mbyt krejt, me ia marrë fytyrën, me ia damkos kryet, me i bá gjithçka; po kur vjen puna për në facebook ia shkrue me të madhe emër e mbiemër të tij, ndërsa Shqipërisë ia shkrue me të vogël. Dihet se Edi Rama nuk ka fuqi hipnotizuese, po me sa duket disa figura politike i ka “kthye në robot politik”, aqsa edhe kur ia përmendin emrin e mbiemrin ia shkruajnë si me “pultim telekomandë” me të madhe.

Dikur, dikush, në kohë të djehit, u zatet udhës me rojtarin e pyjeve, të cilit ia dinte mirë emrin Mirash po e thirri Marash. Atëherit, Mirashi i tha se kam me të mësue me ma dit emnin. E ashtu ndodhi. Ai udhëtari preu dru në pyll dhe e nxuni rojtari. Ia preu gjobën. Kjo i dogji atij, ndaj e thirri në emën: o Mirash…! A ma mësove emnin i tha Mirashi atij e i shtoi: ma gëzofsh gjobën! Me sa duket Edi Rama i ka mësue shumë prej politikanëve të së djathtës se si me ia dijtë dhe me ia shkrue tamam emrin e mbiemrin e tij… edhe para Shqipërisë!

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Aktualitet

    Prishtina shtrenjton parkimin, deri në 20 Euro për një ditë në qendër
  3. Aktualitet

    Shqipëria dhe Kosova forcojnë bashkëpunimin për shpëtimin në male
  4. Aktualitet

    Bota përballet me mungesë financimi prej 30 trilionë Eurosh
  5. Aktualitet

    Turizmi botëror drejt rekordit: 1.57 miliardë mbërritje më 2026

Më shumë nga Zëra