E mërkurë, 18 nëntor 2026

Rubrikat

Mbështet Limit.al

SAGA PËR UÇK-në HISTORIKE

Nga Abdyl Kadolli

Monografia dhe dokumentari “Syri i Shqiponjës” i autorit Ilaz Kadolli është një dëshmi burimore për historinë tonë të re. Aty përjetohen ngjarjet dramatike të fundshekullit të kaluar, si Demonstratat historike ’81, nga doli Lëvizja Popullore e Kosovës, një organizëm politiko-ushtarak për çlirimin kombëtar. Aty shihen portretet morale të strategëve veteranë, mbledhjet historike, veprimtaria e thellë ilegale, burgjet e rënda dhe flijimet sublime.
Të gjitha këto janë vëzhguar me syrin e shqiponjës për dramën e re historike, organizimin e formacioneve ushtarake, odisenë e furnizimit me armatim dhe heroizmin në fushëbeteja.
Veprat binjake “Syri i Shqiponjës” janë vetëm një fragment i Luftës së madhe çlirimtare dhe një dëshmi e gjallë historike për luftën e drejtë të UÇK-së dhe rreshtimin historik me aleatët e natyrshëm. Ato dëshmojnë se pa organizimin politiko-ushtarak të Lëvizjes Popullore të Kosovës dhe pa mbështetjen e shtetit shqiptar, nuk do të kishte as UÇK historike, ndërsa pa Luftën e shenjtë çlirmtare nuk do të ndodhte as ndërhyrja ndërkombëtare dhe çlirimi i Kosovës martire.
Edhe pse një ushtri e re vullnetare, UÇK-ja ishte një universitet i madh kombëtar, që krijoi përvojën e denjë luftarake dhe lindi shumë dëshmorë, heronj dhe strategë ushtarakë.
Në këto vepra ndriçohen shumë anë të panjohura të Luftës çlirimtare dhe kuptohet çmimi i shtrenjtë i lirisë. Pa dyshim, pjesa më tragjike e kësaj lufte ishte familja dhe femra shqiptare, ku u derdh gjithë urrejtja fashiste serbe mbi vitalitetin shqiptar.
Edhe Lufta jonë çlirimtare kishte dramën e vet, me fërkime e lajthitje të natyrshme, ku përthyheshin sfidat diversive për ngjyrimin ideologjik e fetar të UÇK-së, iluzionet dhe pykat politike.
Autori është aktor i dramës së re historike dhe dëshmitar për vlerat morale, etike e historike të UÇK-së, që përgënjeshtrojnë akuzat e intrigat e luftës speciale nga armiku dhe nga qyqarët tanë që nuk kanë bërë asgjë për lirinë e Kosovës. Të gjitha ato intriga kanë një emërues të përbashkët dhe vijnë nga laboratori UDB-esk. Ato shpifje do t’i marrë shpejt era dhe do të fundosen në llumin e kohës, sepse historinë e bëjnë vetëm veprat e saj monumentale.
Lufta jonë çlirimtare ishte e ligjshme përballë gjenocidit serb, një ndeshje e vendimtare me pushtuesin e egër dhe këtë luftë e fituam pas disa kryengritjeve të mëparshme. Në saje të kësaj lufte çlirimtare sot pozicioni ynë kombëtar ndodhet në zonën e natyrshme gjeostrategjike.
UÇK-ja është dinjiteti ynë kombëtar që realizoi me heroizëm pas mbi një shekulli testamentin e Lidhjes Shqiptare të Prizrenit, mu në qershorin e saj historik.

Lavdi UÇK-së historike!

Lavdi dëshmorëve dhe martirëve të kombit!

_______

*Fjalë në përurimin e monografisë dhe të filmit dokumentar “Syri i Shqiponjës” të autorit Ilaz Kadolli dhe regjisorit Petrit Ruka, Prizren, më 10 Qershor 2018.

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Histori