E mërkurë, 18 nëntor 2026

Rubrikat

Mbështet Limit.al

Jam libër i hapur

Nga Namik SELMANI – Boston – SHBA

Jam libër i hapur
Me shkronja që hyjnë e dalin si delet në stanin me gjerdhe.
Me një ballinë
Ku nuk ka emër botuesi a ndonjë çmim
Më bëhet
Si një fole zogu e fshehur mes manit me gjethe
Herë si kitarë
Që tringëllin me mall në muzg e në agim..

Jam libër i hapur
Si ca letra të padërguara nga duar postjerësh.
Me gugatje pëllumbash
Që kërkojnë grurë nga duart e bardha të fëmijëve.
Gëzoj pranë tij
Si pranë të qarës së foshnjës të sapolindur mes pelenash.
Pa e ditur
Se sa udhëkryqe do të ketë në vrapërimin e viteve.

Jam libër i hapur
Me fletë si pergamen i një papirusi të lashtë
Me kapakë
Si petale trëndafilësh që i ka mbjellë dikur gjyshja.
Me shkronja
Që rrinë si gurët e skalitur në bedenat e kalasë.
Me cicërimat-simfoni
Që më sjell në çdo prag pranvere dallandyshja..

Jam libër i hapur
Që më ngjan si puthje dashurie a tjegulla çatie
Si bukët e furrave
Që shumë herë nuk e kanë aromën e ëmbël.
Lumturohem
Nëse një ditë do ta lexojnë djemtë e vajzat me hire.
E mos më thoni
Aherë se nuk jam në Liqenin e Luleve a në ëndërr.

Ashtu jam
Me urimin që kurrë të mos bëhem hi zjarri.
Të mos bëhem
Pjesë e mallkimit që marrin shpesh shkronjëtarët
Një lis
Mund të digjet nga rrufeja a nga një sëpatë druvari.
Po libri
mos u bëftë si farat që kalben pa mbirë te arat.

Jam libër i hapur
Me shkronja malli, gërvishje në gjunjë e në duar
Me sy
Që herë qiellëzohen e herë mbyten me lotë.
Me mollëza
Të dridhura nga prekja e përkëdhelja e vonuar.
Me çarçafë
Që hidhen supeve të zbuluar ku djersa pikon.

Jam libri me fletë kaherë të hapura
Si këmbanë me tinguj të zgjatura…

Boston, 20 qershor 2018

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Diaspora