E mërkurë, 18 nëntor 2026

Rubrikat

Mbështet Limit.al

Zelensky e quan “absurde” presidencën ruse të Këshillit të Sigurimit

Presidenti i Ukrainës, Volodymyr Zelensky, e ka kritikuar marrjen e presidencës së Këshillit të Sigurimit të OKB-së nga Rusia “absurde dhe shkatërruese”. Sipas tij, kjo e dëshmon “falimentimin e plotë të institucioneve ndërkombëtare”.

Duke folur në orët e vona të së shtunës, 1 prill, Zelensky tha se “ata që janë përgjegjës për terror” nuk duhet të lejohen të kryesojnë organet ndërkombëtare.

“Ushtria ruse vrau një tjetër fëmijë ukrainas – një djalë 5 muajsh nga Avdijivka… Dhe në të njëjtin moment, Rusia kryeson Këshillin e Sigurimit të OKB-së”, tha Zelensky.

Ndërkohë, shefi i politikës së jashtme të BE-së, Josep Borrell, tha se Bashkimi Evropian do ta kundërshtojë çfarëdo tentimi për abuzim të presidencës së Këshillit të Sigurimit OKB-së nga Rusia gjatë muajit prill.

“Pavarësisht se Rusia është një anëtare e përhershme e Këshillit të Sigurimit, Rusia vazhdimisht e shkel thelbin e kuadrit ligjor të OKB-së”, tha Borrell në Twitter.

Më herët, ministri i Jashtëm i Ukrainës, Dmytro Kuleba, e quajti marrjen e presidencës nga Rusia “një shuplakë në fytyrë për komunitetin ndërkombëtar”. Ai u kërkoi anëtarëve të tjerë të Këshillit të Sigurimit të OKB-së që të mos e lejojnë Moskën të abuzojë me presidencën e saj.

Këshilltari presidencial në Ukrainë, Mykhaylo Podolyak, tha se kjo ngjarje ishte “një tjetër përdhunim i ligjit ndërkombëtar”.

“Një ent që bën një luftë agresive, shkel normat e ligjit humanitar dhe penal, shkatërron Kartën e OKB-së, neglizhon sigurinë bërthamore, nuk mund ta kryesojë organin kryesor të sigurisë në botë”, tha Podolyak në Twitter.

Rusia mori presidencën njëmujore, e cila ndërrohet në bazë të një rendi, të Këshillit të Sigurimit të OKB-së më 1 prill – për herë të parë që nga shkurti i vitit 2022, kur nisi luftën e saj të paprovokuar kundër Ukrainës.

Pushtimi rus i Ukrainës shkeli Kartën e OKB-së, e cila kërkon që shtetet të përmbahen nga përdorimi i forcës kundër integritetit territorial ose pavarësisë politike të një shteti tjetër.

Disa ditë pasi kishte filluar pushtimi i Ukrainës, Asambleja e Përgjithshme e OKB-së kishte miratuar një rezolutë duke kërkuar që Rusia t’i jepte fund luftës së saj në Ukrainë. Rusia bllokoi miratimin e një rezolute të ngjashme në Këshillin e Sigurimit.

Presidenca ruse e Këshillit të Sigurimit të OKB-së vjen gjithashtu pas një urdhër-arresti të Gjykatës Penale Ndërkombëtare për presidentin rus Vladimir Putin, duke e akuzuar atë si përgjegjës për dëbimin e paligjshëm të fëmijëve nga Ukraina, që përbën një krim lufte.

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Bota