Rusia thotë se sanksionet që Shtetet e Bashkuara, Kanadaja dhe Bashkimi Evropian kanë imponuar ndaj saj, lidhur me sulmin rus të vitit 2018 ndaj tre anijeve ukrainase, aneksimit të Krimesë dhe aktiviteteve ruse në Ukrainën Lindore, nuk do të mbeten pa përgjigje.
Departamenti amerikan i Thesarit tha në një deklaratë të premten se sanksionet e tij vënë në shënjestër “gjashtë individë rusë dhe tetë entitete në përgjigje të agresionit të vazhdueshëm të Rusisë në Ukrainë”.
“Kjo nismë e përbashkët me partnerët tanë në Bashkimin Evropian dhe Kanada, përforcoon angazhimin tonë për të vendosur sanksione të konsiderueshme në përgjigje të përpjekjeve të Kremlinit për të shpërfillur normat dhe për të minuar sovranitetin dhe tërësinë territoriale të Ukrainës”, tha në një deklaratë Sekretari i Thesarit, Steven Mnuchin.



