E mërkurë, 18 nëntor 2026

Rubrikat

Mbështet Limit.al

Lavrov fajëson SHBA-të për rritjen e tensioneve në nivel botëror

Ministri i Jashtëm në detyrë i Rusisë, Sergey Lavrov, ka fajësuar, siç tha, politikat “agresive” të SHBA-së për rritjen tensioneve në nivel botëror, si dhe i bëri thirrje Uashingtonit dhe Teheranit t’i shtensionojnë raportet ndërmjet tyre.

Duke folur në konferencën e tij vjetore për media më 17 janar, Lavrov e cilësoi rrëzimin e aeroplanit ukrainas, nga ana forcat iraniane të mbrojtjes ajrore, si një sinjal paralajmërues për të filluar qetësimin e situatës.

“Një rritje e tensioneve midis Iranit dhe Shteteve të Bashkuara nuk do të ndihmojë në zgjidhjen e asnjëres prej krizave në rajon”, tha Lavrov.

Rrëzimi i aeroplanit ukrainas në Teheran, më 8 janar, vrau 176 persona në bord.

Tragjedia ndodhi disa orë pasi Irani gjuajti me raketa balistike në dy baza që strehonin forcat e SHBA-së në Irak, si përgjigje ndaj vrasjes së komandantit të lartë iranian, Qasem Soleimani, nga një sulm ajror amerikan.

Autoritetet iraniane fillimisht mohuan çdo përgjegjësi, por tre ditë pas incidentit pranuan se avioni u qëllua “pa dashje”.

Lavrov tha se ai nuk po bënte “justifikime për askënd”, por operacioni “i pashembullt” i SHBA-së “minoi dhe vuri në dyshim të gjitha normat e ligjit ndërkombëtar.”

Lavrov gjithashtu kritikoi Britaninë, Francën dhe Gjermaninë për nxitjen e një mekanizmi përçarës, sa i përket marrëveshjes bërthamore midis Iranit dhe fuqive globale.

Ai përmendi uljen e angazhimit të Teheranit në këtë marrëveshje, të cilën Shtetet e Bashkuara e braktisën njëanshëm në vitin 2018.

Teherani ka bërë disa hapa prapa nga përmbushja e angazhimeve të tij për paktin e vitit 2015-të, pasi presidenti i SHBA-së, Donald Trump, tërhoqi vendin e tij nga marrëveshja dhe zbatoi sanksione të ashpra ndaj Iranit.

Palët e mbetura të marrëveshjes – tre fuqitë evropiane, plus Kina dhe Rusia – janë zotuar ta mbajnë “të gjallë” marrëveshjen.

Por, partnerët evropianë nuk kanë qenë në gjendje t’i ofrojnë Teheranit një zgjidhje për të shitur naftën e papërpunuar jashtë vendit, pavarësisht sanksioneve të SHBA-së.

Kjo situatë ka bërë që vlera e monedhës së Iranit të bie, duke ngritur nivelet e inflacionit.

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Bota