E mërkurë, 18 nëntor 2026

Rubrikat

Mbështet Limit.al

Britania kërkon shtyrjen me tre muaj të afatit për shkëputje nga BE

Kryeministrja britanike Theresa May i kërkoi Bashkimit Evropian të mërkurën të shtyjë afatin e daljes së Britanisë me tre muaj, deri më 30 qershor.

Dalja e Britanisë nga BE-ja është parashikuar të ndodhë më 29 mars, por parlamenti nuk ka qenë në gjendje pas disa procesesh votimi të bjerë dakord mbi kushtet e largimit të vendit. Ligjvënësit kanë debatuar rreth hollësive të kalimit të përditshëm në kufirin mes Irlandës anëtare të BE-së dhe asaj pjese të Irlandës së Veriut që kontrollohet nga Londra, së bashku me çështje të tregtisë.

Çdo shtyrje e afatit për daljen nga BE-ja ka nevojë për miratimin e të gjitha vendeve anëtare, që pritet të zhvillojnë një takim të enjten në Bruksel. Bisedimet e Britanisë me BE-në kanë zgjatur më shumë se dy vjet.

Presidenti i Komisionit Europian Jean-Claude Juncker tha të mërkurën se BE-ja nuk është e hapur për negociata të mëtejshme mbi daljen e Britanisë nga blloku dhe nuk ka gjasa të vendosë këtë javë nëse do t’i mundësojë Britanisë një shtyrje të afatit për daljen, e parashikuar të ndodhë më 29 mars.

Deri tani, Dhoma britanike e Komuneve ka hedhur poshtë me vendosmëri kushtet që negociatorët britanikë dhe ata të BE-së arritën pas dy vjet bisedimesh dhe ka sinjalizuar gjithashtu një kundërshtim për ta realizuar shkëputjen pa marrëveshje.

Zoti Juncker i tha radios gjermane Deutschlandfunk se zonja May duhet t’i tregojë BE-së më shumë qartësi rreth planeve të Britanisë në mënyrë që të fitojë një zgjatje të periudhës, e cila duhet të miratohet nga të gjitha vendet anëtarë të BE-së.

“Nuk do te ketë negociata të reja dhe asnjë garanci shtesë mbi ato që kemi dhënë,” tha ai.

Zonja May kërkoi një votim tjetër në parlament për kushtet e propozuara për t’u larguar nga BE-ja, por Kryetari i Dhomës së Komuneve John Bercow vendosi këtë javë se kryeministrja nuk mund të vazhdojë t’u kërkojë ligjvënësve të votojnë për një propozim të cilin ata e kanë refuzuar tashmë.

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Bota