Bashkimi Europian kërkon të rrisë ndikimin e tij në botë në 5 vitet e ardhshme e të luajë rolin e tij në formimin e të ardhmes globale. Kjo del nga strategjia e unionit deri në vitin 2024.
Bashkimi Europian “duhet të bëhet më i fuqishëm dhe më me vetëbesim”, thuhet në një dokument strategjik të BE, që e zotëron agjencia gjermane e lajmeve, dpa. Për këtë nevojiten “më shumë burime”, pra më shumë fonde. Edhe dera për anëtarë të rinj në BE do të mbetet e hapur.
Dokumenti 5-faqësh që do të paraqitet në samitin e BE javën e ardhshme e vazhdon në vijat themelore kursin e njohur politik të BE në politikën e jashtme. Nuk ka ndonjë ndërrim të dukshëm të tij apo iniciativa të reja. Ky dokument që do të diskutohet nga 28 vendet anëtare në ditët e ardhshme mund të plotësohet më tej.
BE të luajë rol në formimin e të ardhmes globale
Në politikën e jashtme BE kërkon që t’i përfaqësojë pozicionet e saj më më vendosmëri e më e unifikuar. Në mbrojtjen e klimës, pavarësisht protestave të të rinjve dhe debateve në fushatën zgjedhore europiane, BE nuk paraqet ndonjë objektiv konkret. Dokumenti i referohet marrëveshjes për klimën e arritur në vitin 2015. Megjithatë thuhet aty “BE nuk mund të veprojë vetëm: të gjitha vendet duhet të ecin përpara e të bëjnë më shumë për mbrojtjen e saj”.



