E mërkurë, 18 nëntor 2026

Rubrikat

Mbështet Limit.al

Mali i Zi po kërkon t’i rrënojnë stanet e Shqiptarëve të Kosovës në bjeshkën e Ishtedimit në Rrozhajë (!)

Këto stane në bjeshkën e Ishtedimit në Rrozhajë, në lartësi mbi 2 mijë metra katërore, që disa sish i shihni në foton e masipërme, i kanë trashëguar shqiptarët e Kosovës ndër brezni, nga stërgjyshërit e tyre, të cilat në vitet e fundit edhe i kanë rinovue ato, në mënyrë që t’i vizitojnë kohë-pas-kohe dhe të jetojnë në to për verime e pushmore në kushte sa ma bashkëkohore.

Në ditët e fundit, ndërkohë që stanet janë të vetmuara nga banorët e tyre trojenikë, zyrtarë lokal apo qendror të Malit të Zi kanë shkuar atje dhe kanë vendos në dyert e tyre “ultimatume” shkrimore me afat kohor për prishjen e tyre me eskavator, për rrafshimin e tyre deri në themelet trojenike shqiptare, pasi shteti malazez e ka projekt të përshpejtuar ndërtimin e atyshëm të një qëndre skijimi (për ski) për skijatorë e vizitorë, edhe turistë të huaj.

Pronarët e staneve e të tokës bjeshktare në Ishtedim pohojnë për masmediat e Kosovës se çështjen pronësore e kanë për gjykim në Gjykatën Supreme të Malit të Zi, po ende nuk kanë marrë një vendim prej saj; se po kërkojnë të marrin dhe disa dokumentacione shtesë në arkivat e Turqisë për këto troje të bleme me lira e dukat; se kanë pasë marrëveshje të hershme me shtetin e Jugosllavisë së dikurshme për toka e kullosa për shkak të tatimeve shtetërore jugosllave; se ka pasë raste dhe ndonjë riblerje pronësore të tyre, etj., etj.

Shqiptarët e Kosovës, që i kanë të tyret këto prona e stane në bjeshkën e Ishtedimit në Rrozhajë, po i kërkojnë Qeverisë së Kosovës që të ndërhyjnë sa ma energjekisht e urgjentisht pranë Qeverisë së Malit të Zi për zgjidhjen e cështjes së tyre që rrezikojnë t’iu rrënohen stanet bjeshktare nga shteti malazez. Ndërkohë, kryeministri në detyrë, Ramush Haradinaj, ka thanë për T-7 në Kosovë, se është i njoftuem nga banorët për këtë çështje të tyre dhe ka pohuar zyrtarisht e publikisht: “Ajo (bjeshka) është në territor të Malit të Zi, ka disa vështirësi në mënyrë e shfryzimimit….duhet m’u arritë një marrëveshje mes Kosovës dhe Malit të Zi, ende nuk kam ndërmarrë proçedurat dhe ende s’kam arritë me e zgjidhë problemin”. Gjithashtu, Qeveria e Malit të Zi ende nuk iu ka kthye përgjigje plotore asnji institucioni zyrtar të Kosovës, as ndonjë masmedia si T-7, as vet shqiptarëve trojenikë të bjeshkës së Ishtedimit në Rrozhajë.

Sigurisht, “Çështja Ishtedimi” nuk është aq e lehtë saç duket me kaq sa themi e me ato çka ka ndodhë e pritet të ndodhin së shpejti, pasi në të tilla raste gjykimi e veprimi kemi praktika e përvoja të hidhura kombëtare, pasoja të mëdha ndaj Shqiptarëve të Kosovës si me Çakorrin e Kullën. Gjithashtu, Shqiptarët e Kosovës, që e dijnë e ndjejnë veten e tyre trojenik pronësor në bjeshkën e Ishtedimit në Rrozhajë, duke e ditë se çka e qysh ndodhi me Çakorr e Kullë, kanë pasë kohë të mjaftë me u marrë sigurimin e dokumentave përkatëse e me zgjidhje ligjore të problemit të tyre të tokës e staneve në këtë bjeshkë, tashma në territorin e Malit të Zi. Njëkohësisht, edhe shteti i Malit të Zi ia ka gjuejt kohën ma të përshatshme për me u marrë me këtë çështje, sepse Kosova është në ditët finale elektorale e tuj i ndrrue pushtetet e qeverisjes së saj, por dhe stanet kanë qënë të vetmueme nga banorët e “pusullat ultimatume” të shtetit malazez kanë mujt me i pa vetëm zogjtë e kafshët e malit apo ndonji kalimtar i rastit.

Sidoqoftë,  Shqiptarët e Kosovës që kanë pronat e veta me toka e stane bjeshktare në Ishtedim të Rrozhajës duhet me u bashkue ma mirë e ma fort se anjëherë e me kërkue të drejtat e veta ligjore e pronësore të pretenduara prej tyre, duke sigurue me emergjenci dokumentacionin përkatës në Turqi e kudo tjetër; duke e ndjekë çështjen në rrugë gjyqësore në Gjykatën Supreme të Malit të Zi me avokatë të kalibrit të lartë; duke ua ba të njohur edhe Ndërkombëtarëve në Kosovë e Bruksel – në linjat BE e NATO – çështjen e tyre në proçes e me rrezikshëmri të marrjes e damtimit të pronave të tyre; duke ua ba të ditun shtetit malazez në Çetinë e Podgoricë se çështjen e pronave të tyre tokë e stane në bjeshkën e Ishtedimit në Rrozhajë do ta ndjekin deri në Gjykatën e Strasburgut. Nuk është koha e pushkës dhe as e istikameve, por e penës dhe e lapsit, me ecë me mend në kokë e me kambë në tokë edhe “Çështjen e Ishtedimit”, kësaj bjeshke në Rrozhajë, një nga bjeshkët ma të bukura të Alpeve Shqiptare në katështetshin ballkanik. /Rali LURA/

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Bota