Me rastin e Ditës së Pavarësisë, e cila më 21 maj festohet në Mal të Zi, kryeministri Dritan Abazoviç tha se “ka vend për të gjithë në Mal të Zi dhe për këtë arsye nuk mund të lejojmë mosrespektimin e shtetit dhe simboleve të tij”.
Kryeministri malazez kujtoi se 16 vjet më parë, pas gati një shekulli, Mali i Zi u bë sërish shtet i pavarur dhe flamuri i tij u vendos në selinë e Kombeve të Bashkuara. “Kaluan gjashtëmbëdhjetë vjet që nga shpallja e pavarësisë në vitin 2006. Ndërsa festojmë këtë ditë të madhe dhe historike të vendit tonë, ne duhet të pyesim veten nëse kemi bërë mjaft për të fuqizuar Malin e Zi dhe për ta bërë atë të pranueshëm për të gjithë”, tha Abazoviç.
“Qëllimi ynë është që këtë ditë ta festojnë të gjithë qytetarët e shtetit tonë, pavarësisht se si kanë votuar para gjashtëmbëdhjetë vitesh, si deklarohen dhe cilit Zot i luten ”, tha kryeministri Abazoviç.



