E mërkurë, 18 nëntor 2026

Rubrikat

Mbështet Limit.al

LAMTUMIRË, SULEJMAN GASHI – Nga Harry BAJRAKTARI – Nderi i Kombit, SHBA

Me pikëllim të thellë mora lajmin e hidhur për vdekjen e gazetarit dhe publicstit Sulejman Gashi, i cili nga kjo botë iki i ri, ku vdekja mizore ia ndrërpreu aktivitetin e tij si gazetar i përkushtuar për çështjen e Kosovës. Kontributi i Sulejmanit Gashit ishte i veçantë, jo vetëm në fushën e gazetarisë, por edhe si veprimtar e atdhetar i devotshëm i çështjes kombëtare.
Unë pata rastin të punojmë së bashku në hapjen e gazetës Illyria në vitin 1991. Ai ishte njëri prej gazetarëve të redaksisë që u angazhua nga dita e parë në mënyrë që kjo gazetë ta afirmonte çështjen e Kosovës dhe demokratizimin e Shqipërisë në Washington. Në këtë kohë Kosova ishte nën terrorin serb, kurse Shqipëria po sa kishte dalë nga diktatura e egër komuniste.
Sulejman Gashi në faqet e gazetës Illyria publikonte shkrimet nga OKB në New York dhe nga Administrata amerikane në Washingtoni për Kosovën dhe Shqipërinë, duke bërë thirrje që vullneti i popullit të Kosovës për liri të gjente një përkrahje më energjike nga Shtetet e Bashkuara të Amerikës.

Ai ka dhënë kontribut të theksuar edhe në Televizionin e Prishtinës para luftës dhe pas saj në RTK, si dhe në mjetet tjera të informimit, si në Kosovë, ashtu edhe në Shqipëri. Vdekja e tij është një humbje e madhe në afirmimin e çështjes sonë kombëtare në botën demokratike.

Sulejman Gashi i përkiste familjes së madhe atdhetare të Ramadan Shabanit të Kijevës. Ramadani ishte një legjendë e pajtimit të gjaqeve mes familjeve, fiseve dhe individëve në Kosovë dhe përtej saj. Edhe vetë Sulejmani ishte i pasionuar pas filozofisë popullore dhe misionit paqësor të paraardhsve të tij. Fliste edhe për gjyshin e tij Rexhë Asllani, gjithashtu i njohur si veprimtar në pajtimin e gjaqeve, duke mos kursyer asgjë për pajtim kombëtar. Kështu kishin vepruar edhe Binak Alia dhe Xhemail Obria në rrethana të ndryshme politike.
Sulejman Gashi u lind në Kumanovë, në një periudhë kur babai i tij si mësues qe i detyruar ta braktiste Kosovën nga terrori i Rankoviqit dhe të kalonte në Maqedoni. I ati i tij punoi atje dhe në një klimë më të volitshme politike u kthye në Kosovë. Sulejmani ka qenë shumë i lidhur për Kosovën dhe vendlindjen e tij, Kijevën. Atje, kohëve të vona, nga malli ndërtoi një shtëpi në Kijevë që ta kishte kur shkonte në Kosovë. Në bisedat që kishim në ndeja të ndryshme, gjithherë më përmendte paraardhësit e tij, duke treguar historinë dhe dashurinë për atdheun dhe njerëzit atje. Pra, edhe Sulejmani ruante me fanatizëm trashëgiminë familjare të tij edhe këtu në New York, si pasuri e jetike.
Kështu, edhe djemtë e tij, Driloni dhe Egzoni po shkojnë hapave të babit të tyre, duke punuar për çështjen e Kosovës.
Në emrin tim personal dhe të familjes sime, në këto çaste të rënda të tronditjes, ju shprehi ngushëllimet e mia më të sinqerta për vdekjen e gazetarit dhe publicistit Sulejman Gashi: bashkëshortes së tij Tone Gashit, vajzave dhe djemeve, nënës dhe vëllezërve të tij për këtë humbje të pazëvendësueshme në familje.

Dheu i Kosoves i qoftë i lehte!

Zoti u dhashtë forcë.

New York 2020

STAFI I GAZETES ILLYRIA 1992. (Nga e Majta): Muhamet Mjeku, Sulejman Gashi, Etrit Bardhi, Charles Caruso, Jusuf Hajrizi
Petrit Bardhi, Joseph Finora (Ulur): Harry Bajraktari, Naime Lutolli, Vehbi Bajrami, Deborah Agnus

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Bota