E mërkurë, 18 nëntor 2026

Rubrikat

Mbështet Limit.al

Kryetari i LDK-së, Isa Mustafa: Qeveria të ndryshojë qëndrim ndaj SHBA-së dhe BE-së

Kryetari i partisë më të madhe opozitare në Kosovë, Lidhjes Demokratike të Kosovës, Isa Mustafa, tha se Qeveria aktuale duhet t’i ndryshojë qëndrimet dhe sjelljet e saj, karshi partnerëve evropianë dhe Shteteve të Bashkuara të Amerikës.

“Ne jemi munduar që qeverisjes aktuale t’ia bëjmë me dije se duhet t’i ndërrojë qëndrimet e saj, sjelljet e saj, sepse është në interes të vendit që ne të kemi bashkëpunim më të mirë me partnerët tanë evropianë dhe veçmas me Shtetet e Bashkuara të Amerikës”, tha Mustafa gjatë shënimit të 29-vjetorit të themelimit të Forumit të Gruas dhe të Rinisë të LDK-së .

Mustafa tha se LDK-ja do të japë “kontributin në thellimin e miqësisë me Shtetet e Bashkuara të Amerikës” dhe se Kosova ka vetëm një rrugë, “e ajo është anëtarësimi në Bashkimin Evropian”.

Ai e kritikoi Qeverinë aktuale të Kosovës, që udhëhiqet nga Ramush Haradinaj, se nuk po merret me problemet e qytetarëve, por, siç u shpreh ai, “po i mbulon këto probleme me disa vendime, për të cilat prapë duhet të mendojë se si t’i zgjidhë”.

“Ashtu siç i kanë marrë (vendimet) duhet që ta gjejnë çelësin për t’i zgjidhur, në mënyrë që Kosova të dalë nga ky kolaps politik dhe institucional”, tha Mustafa.

Qeveria e Kosovës, qysh në nëntor të vitit të kaluar, u ka vënë taksë 100% mallrave të importuara nga Serbia dhe Bosnje e Hercegovina.

Shtetet e Bashkuara vazhdimisht kanë thënë se taksa nuk është në përputhje me interesat amerikanë dhe kanë kërkuar që ajo të hiqet.

Heqjen e taksës e ka kërkuar edhe BE-ja, ndërsa presidenti i Serbisë, Aleksandar Vuçiq, ka thënë se dialogu për normalizim marrëdhëniesh me Kosovën nuk do të vazhdojë derisa kjo taksë të jetë në fuqi.

Kryeministri i Kosovës, Haradinaj, ka thënë se taksa do të mbetet derisa Serbia ta njohë pavarësinë e Kosovës.

Të fundit

  1. Aktualitet

    Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e Gjermani
  2. Opinione

    Trazira në Europë, aty ku Perëndimi i trazuar takohet me Lindjen paqësore
  3. Aktualitet

    Prishtina shtrenjton parkimin, deri në 20 Euro për një ditë në qendër
  4. Aktualitet

    Shqipëria dhe Kosova forcojnë bashkëpunimin për shpëtimin në male
  5. Aktualitet

    Bota përballet me mungesë financimi prej 30 trilionë Eurosh

Më shumë nga Bota