Deputetët gjermanë po shqyrtojnë një projekt-ligj të ri që synon reduktimin e ndotjes së mjedisit nga mbetjet e pajisjeve elektronike, si smartfonët, tabletat e kompjuterët. Mbetjet e këtyre pajisjeve renditen ndër ndotësit më të mëdhenj të rezervave ujore nëntokësore, pasi kur hidhen nëpër landfille lëshojnë lëndë helmuese vdekjeprurëse.
Grupimi i të gjelbërve ka paraqitur në parlamentin gjerman propozimin që çmimit të çdo smartfoni apo pajisjeve të tjera elektronike, t’i shtohet 25 euro. Këtë shumë përdoruesit do t’a marrin mbrapsht nëse pajisjet e tyre të vjetruara i dorëzojnë nëpër dyqanet e elektronikës.
Qëllimi i nismës është që këto pajisje të mos hidhen në koshin e mbeturinave, por të shtohet ritmet e riciklimit të tyre, pasi aktualisht vetëm 20% e këtyre mbetjeve riciklohen. Për më tepër, sipas ricikluesve në 1 tonë mbetje elektronike gjen 100 herë më shumë ar dhe argjend sesa në të njëjtën sasi të nxjerrë nga nëntoka.



