Për herë të parë në jetë kravatën e kam parë në qafën e mësuesit tim, në shtatorin e vitit 1960. Një muaj më vonë, kur na e sollën Abetaren, në faqen e tretë ishte një njeri me syza dhe me kravatë veçse, ndryshe nga e mësuesit, diku nga mesi kishte një mbërtheckë metalike. Në fund të gjysmëvjetorit mezi ia lexuam emrin: Josip Broz Tito, ngaqë z-në nuk e kishim mësuar ende.
Në Shkollën Normale në Prishtinë, kur erdhi fundi i vitit të pestë dhe duhej të mbanim praktikën e mësimdhënies, doemos që duhej ta vënim kravatën. Sekush seku e gjeti një dhe gjithë klasa e përdorëm me radhë.
Më 1973 para se të nisja punën e arsimtarit në katundin tim, në një dyqan tekstilesh bleva një këmishë që vinte detyrimisht me kravatë. Kravata e vetme që kam blerë gjatë gjithë jetës, veçse ajo tashti mungon në koleksionin tim prej 130 sosh.
Gjithë kjo hyrje për hiçgjë, sepse legjenda për kravatën u stis me një ish-kryeministër që trefishoi rrogën e vet se duhej blerë kravata. Edhe për mua qe një ngasje t’i futësha biznesit me një goxha kapital prej aq kravatave të dhuruara që kisha. Po s’qe e thënë. S’isha i prerë për atë dalldi.
Legjendën e kravatës e ndërthurën më tej portalet, mediet, forumet e të tjera kur e panë të shfaqej edhe në qafën e Albin Kurtit. Sa e vuri ai qitën e thanë: keni për të parë tani! S’dihej në ishte fjala për mirë a për keq.
Albini u bë kryeministër dhe përgjysmoi pagën e vet. Si duket, edhe ai si unë, paska pasur shumë kravata të dhuruara!
Grenellin e pashë një pasdite në takim me presidentin tonë pa kravatë.
Ç’shenjë të jetë kjo?
Ç’shtjellë do të marrë tutje legjenda për kravatën?
Të fundit
Aktualitet
Rekord në Ballkan/ 11,4 mijë studentë nga Shqipëria studiojnë jashtë, kryesoisht në Itali e GjermaniAktualitet
Prishtina shtrenjton parkimin, deri në 20 Euro për një ditë në qendërAktualitet
Shqipëria dhe Kosova forcojnë bashkëpunimin për shpëtimin në maleAktualitet
Bota përballet me mungesë financimi prej 30 trilionë EuroshAktualitet
Turizmi botëror drejt rekordit: 1.57 miliardë mbërritje më 2026



