Parlamenti i Iranit ka miratuar parimet e një projektligji të ri, i cili synon të kufizojë kontaktet me media dhe institucione të huaja të konsideruara armiqësore ndaj Republikës Islamike, veçanërisht ato të financuara nga Shtetet e Bashkuara të Amerikës ose Izraeli.
Sipas projektligjit, intervistat apo pjesëmarrja në diskutime me këto media do të konsideroheshin vepra penale dhe mund të dënoheshin me 6 muaj deri në 2 vite burg. Për kontaktet me media të tjera të huaja do të kërkohej njoftimi paraprak i Ministrisë së Inteligjencës, ndërsa komunikimet e paautorizuara me ambasada apo organizata të huaja do të mund të sillnin gjoba dhe kufizime të të drejtave sociale.
Projektligji parashikon gjithashtu masa më të ashpra për bashkëpunimin ekonomik, shkencor dhe politik me subjekte të huaja. Propozimet politike të bëra nën ndikimin e shërbimeve të huaja të inteligjencës, nëse vlerësohen se dëmtojnë sigurinë ose pavarësinë e Iranit, mund të dënohen deri në 30 vite burg.
Nisma duhet të shqyrtohet nen për nen nga parlamenti dhe më pas të miratohet nga Këshilli i Gardianëve për të hyrë në fuqi. Çështjet e parashikuara nga ligji do të shqyrtoheshin nga Gjykatat Revolucionare.
Lëvizja vjen pas një ligji të miratuar në vitin 2025, i cili ashpërsoi dënimet për bashkëpunimin e dyshuar me shtetet armiqësore.
Së fundmi, fotoreporteria iraniane Yalda Moaiery është dënuar me 15 vite burg në bazë të këtij ligji, për akuza që lidhen me bashkëpunimin me media të huaja dhe organizata të lidhura me SHBA-në dhe Izraelin.
