Zemërimi, shpesh shihet si një emocion i zakonshëm dhe i përkohshëm.
Megjithatë, hulumtime të reja sugjerojnë se edhe periudha të shkurtra te zemërimit intensiv mund të kenë pasoja të menjëhershme në shëndetin kardiovaskular.
Sipas revistës shkencore “Journal of the American Heart Association”, një studim i kryer me pjesëmarrjen e 280 të rriturve të shëndetshëm zbuloi se vetëm 8 minuta zemërim mund të dëmtonte përkohësisht funksionin e enëve të gjakut për rreth 40 minuta.
Një studim i kryer me pjesëmarrjen e 280 të rriturve të shëndetshëm zbuloi se vetëm tetë minuta zemërim i fortë mund të dëmtojnë funksionin e enëve të gjakut për deri në 40 minuta pas përjetimit të tij.
Studiuesit krahasuan reagimet e pjesëmarrësve që rikujtonin kujtime zemërimi me ata që rikujtonin ndjenja trishtimi apo ankthi.
Rezultatet treguan se grupi që përjetoi zemërim shfaqi përkeqësim dukshëm më të madh të funksionit vaskular.
Çfarë ndodh në trup gjatë zemërimit?
Kur një person zemërohet, organizmi aktivizon mekanizmin “lufto ose ik”, duke çliruar hormone stresi si kortizoli dhe adrenalina. Këto hormone shkaktojnë një sërë reagimesh fiziologjike:
• Ngushtim të enëve të gjakut
• Rritje të presionit të gjakut
• Ulje të rrjedhjes së shëndetshme të gjakut
• Rritje të përkohshme të rrezikut për atak në zemër apo goditje në tru
Këto ndryshime rrisin ngarkesën mbi zemrën dhe sistemin kardiovaskular.
Edhe pse efekti mund të jetë i përkohshëm, përsëritja e shpeshtë e episodeve të zemërimit mund të ketë ndikim akumulues.
Rreziku rritet kur zemërimi bëhet i zakonshëm
Ekspertët theksojnë se zemërimi i rastësishëm nuk është domosdoshmërisht i rrezikshëm për individët e shëndetshëm.
Problemi lind kur shpërthimet e zemërimit bëhen të shpeshta.
Në këto raste, zemra dhe sistemi nervor nuk kanë kohë të mjaftueshme për t’u rikuperuar plotësisht mes episodeve.
Me kalimin e kohës, kjo mund të kontribuojë në dëmtim të enëve të gjakut, formim pllakash aterosklerotike dhe rritje të rrezikut për sëmundje serioze të zemrës.
Si mund të mbrohet zemra?
Specialistët rekomandojnë disa strategji për menaxhimin e zemërimit dhe reduktimin e rrezikut kardiovaskular:
• Të ndaleni përpara reagimit, të merrni frymë thellë dhe të numëroni deri në 10
• Të qëndroni fizikisht aktivë – ecja, joga apo ushtrimet fizike ndihmojnë në uljen e stresit
• Të praktikoni meditimin ose frymëmarrjen e ndërgjegjshme
• Të kërkoni ndihmë profesionale nëse zemërimi është i pakontrollueshëm
Ekspertët kujtojnë se zemra nuk reagon vetëm ndaj asaj që hamë, por edhe ndaj asaj që ndiejmë.
Menaxhimi i emocioneve, veçanërisht i zemërimit, mund të jetë po aq i rëndësishëm sa një dietë e shëndetshme apo aktiviteti fizik në ruajtjen e shëndetit të zemrës.
