Kjo e ardhme do të kërkojë përpjekje bashkëpunuese mes studiuesve, profesionistëve të shëndetit dhe organeve rregullatore për të përcaktuar vendin e printimit 3D në kujdesin shëndetësor
Medikamentet e printuara në 3D mund të jenë e ardhmja e sistemit shëndetësor të personalizuar – një kërkim tregon se tabletat e printuara kanë arritur cilësi të mjaftueshme për të përmbushur standardet e vendosura për medikamentet e prodhuara në mënyrë tradicionale.
Studimi i ri, i publikuar në International Journal of Pharmaceutics, thekson perspektivën që kanë medikamentet e printuara në 3D te pacientët.
Nëse printimi 3D arrihet të përhapet në përdorimin e përditshëm, potenciali thuajse i pakufishëm për të pasur medikamente të përshtatura, sipas nevojave tuaja specifike të shëndetit, mund të bëhet realitet më shpejt nga sa mund ta mendoni.
“Një masë” nuk u përshtatet të gjithëve
Për shumë kohë, medikamentet janë prodhuar me një qasje që mund ta cilësojmë “me të njëjtën masë”, ku tabletat dhe kapsulat janë në dispozicion vetëm në një numër të caktuar dozash.
Por çfarë ndodh nëse ato doza të sakta nuk janë të përshtatshme për ju? Është e vështirë të shmangësh marrjen e një sasie të tepërt ose të pamjaftueshme ilaçesh, kur ato janë vetëm në doza të caktuara.
Kjo mund të sjellë pasoja të rënda kur merren ilaçe të rëndësishme si antidepresivët, që shkaktojnë efekte anësore kur doza ndryshohet shumë shpejt.
Zgjidhja tradicionale në këta skenarë ka qenë ndarja e tabletës në gjysmë ose në katërsh, për të marrë një dozë të mesme. Por kjo nuk është e mundur për të gjitha tabletat, dhe, edhe nëse është, kërkimet tregojnë se shpesh përfundon me një dozë të pasaktë.
Printeri 3D mund të eliminojë supozimet dhe të sigurojë elasticitet për profesionistët e shëndetësisë, duke personalizuar me të vërtetë mjekësinë, sipas nevojës së pacientit.
Shtresë pas shtrese
Ndoshta keni parë printera 3D të prodhojnë lodra, pajisje mjekësore madje edhe ushqime. Printimi i ilaçeve përdor të njëjtën teknologji, duke ndërtuar një tabletë, shtresë pas shtrese, duke e shkrirë medikamentin me përbërës të tjerë të miratuar, për ta ndihmuar që të tretet në stomak.
Tableta mund të printohet në 3D në çdo dozë të kërkuar, duke i dhënë pajisjes udhëzime për ta printuar më të madhe apo më të vogël.
Në studimin tonë të provës, ne mundëm të printojmë tableta 3D me doza shumë të sakta të kafeinës, në një mënyrë që do të ishte jashtëzakonisht e vështirë me metodat konvencionale të prodhimit.
Në vend që të zgjidhnim një dozë të bazuar tek opsionet e kufizuara komerciale, ne zgjodhëm së pari dozën dhe më pas projektuam dhe printuam tabletën. Edhe pse shpesh nuk mendohet si një medikament, zgjedhja e kafeinës në këtë studim është e rëndësishme, pasi është ilaçi i sjelljes më i përdorur në botë.
Të përpiqesh të reduktosh kafeinën shpesh shkakton dhembje koke dhe të vjella, për shkak të vështirësive në uljen e saktë të dozës. Ky është një nga skenarët e shumtë në të cilin, një qasje e vetme, nuk do të ishte e përshtatshme.
Krahasuar me përpjekjet për të ndarë një tabletë kafeine konvencionale në të njëjtat doza, tabletat e printuara në 3D rezultuan se kishin një dozë shumë më të saktë.
Rezultatet tregojnë një proces të thjeshtë për të prodhuar “medikamentin e duhur për pacientin e duhur, në momentin e duhur”. Ky është një nga parimet udhëzuese të mjekësisë së personalizuar.
Evolucion në sistemin shëndetësor
Edhe pse printimi 3D ka qenë i përhapur prej dekadash, përdorimi i tij në prodhimin e ilaçeve – mbi të gjitha në një mjedis spitalor ose farmaci – është shumë i ri.
Ne imagjinojmë printera 3D në farmaci dhe në spitale. Megjithatë, në këtë fazë, kjo nuk do të thotë domosdoshmërisht të zëvendësosh apo të konkurrosh me medikamentet tradicionale.
Shpejtësia e prodhimit të teknologjive aktuale të printimit 3D është shumë e ngadaltë krahasuar me prodhimin konvencional. Përfitimet më të mëdha ka të ngjarë të jenë për pacientët me regjime të ndërlikuara mjekimi, ose ata të cilët marrin disa lloje medikamentesh, si antidepresivët.
Në këtë mënyrë, njerëzit që kanë më shumë nevojë, do të kenë ilaçin e tyre të personalizuar. Në fakt, mundësitë shtrihen përtej sesa thjesht zgjedhja e dozës së duhur.
Praktika e printerit 3D farmaceutik mund të përfshijë kombinimin e shumë ilaçeve në një “polipilulë” të vetme dhe personalizimin e plotë të veçorive si forma, madhësia, ngjyra ose struktura.
Parashikohet evolucioni i shëndetësisë dixhitale, ku printimi 3D ndërthuret me teknologjitë si machine learning (të mësuarit automatik), Inteligjencën Artificiale dhe Big Data, duke hedhur hapin e madh drejt një mjekësie me të vërtetë të personalizuar.
Kjo e ardhme do të kërkojë përpjekje bashkëpunuese mes studiuesve, profesionistëve të shëndetit dhe organeve rregullatore për të përcaktuar vendin e printimit 3D në kujdesin shëndetësor, por mund të na shohë të marrim ilaçin tonë të personalizuar nga një farmaci ose spital lokal, me prekjen e thjesht një butoni.
/ World Economic Forum