Numri i europianëve, që planifikojnë të bëjnë udhëtime nga qershori në nëntor 2023, është ulur me 4% krahasuar me vitin e kaluar, por ende mbetet i lartë, në 69%.
Austriakët, zviceranët dhe gjermanët, shquhen si pushuesit më hezitues, me përkatësisht 45%, 56% dhe 62% të të anketuarve, që kanë plane udhëtimi në muajt e ardhshëm. Në të kundërt, francezët (80%), belgët (79%) dhe britanikët (75%), janë më të etur për të udhëtuar gjatë së njëjtës periudhë.
Megjithëse rënia në synimet për të udhëtuar, mund të shpjegohet me ngadalësimin e kërkesës pas Covid-19, studimi “Monitoring Sentiment for Domestic and Intra-European Travel – Wave 16” nga Komisioni Europian i Udhëtimit (European Travel Commission, ETC) sugjeron se presionet financiare po ndikojnë edhe te pushuesit.
“Të dhënat tona të fundit tregojnë, se shqetësimet mbi inflacionin dhe financat personale, vazhdojnë. Megjithatë, europianët janë ende të etur për të udhëtuar në muajt e ardhshëm. Shumë janë në kërkim të zgjedhjeve alternative të udhëtimit, duke kërkuar përvoja më të përballueshme, ose duke konsideruar udhëtime jashtë sezonit, për të zgjeruar buxhetet e tyre. Ne këshillojmë destinacionet dhe bizneset, që të përfitojnë nga këto tendenca dhe të ndihmojnë udhëtarët, që të dalin nga rruga e gabuar dhe të udhëtojnë në muajt më pak të ngarkuar”, komentoi gjetjet e studimit Miguel Sanz, President i ETC.
Europianët zgjedhin udhëtime jashtë sezonit dhe destinacione më të përballueshme
Gati një e katërta (24%) e turistëve europianë, janë të shqetësuar për rritjen e përgjithshme të kostove të udhëtimit (rritje me 6% kundrejt vitit 2022), ndërsa 17% janë të shqetësuar për situatën ekonomike dhe financat.
Për të përballuar shpenzimet në rritje të udhëtimit, europianët po përshtatin sjelljet, përpara se të arrijnë destinacion dhe pas mbërritjes. 17% synojnë të udhëtojnë jashtë sezonit, për të marrë çmime më të mira, dhe 14% planifikojnë të bëjnë pushime në destinacione, që i perceptojnë si më të përballueshme. Udhëtarët europianë, po kërkojnë gjithashtu bileta më të lira; 13% synojnë të rezervojnë fluturime më herët se zakonisht, për të marrë ofertën më të mirë dhe 12% planifikojnë të fluturojnë me linja ajrore me kosto të ulët.
Ndërkohë, europianët gjithashtu vazhdojnë të përshtatin sjelljen e tyre në destinacion, për t’u përshtatur me buxhetet e disponueshme: 17% do të ulin shpenzimet e blerjeve, 15% do të kërkojnë restorante më të lira dhe 15% do të zgjedhin institucione akomodimi më pak të kushtueshme.
Faktorë të tjerë, që shkaktojnë shqetësime midis udhëtarëve europianë, janë lufta e vazhdueshme e Rusisë në Ukrainë (12%), destinacionet turistike të mbipopulluara (9%), politikat e rezervimit dhe anulimit (9%) dhe kushtet e mundshme ekstreme të motit (8%).
Itineraret e udhëtimit të europianëve varen nga moti i këndshëm dhe ofertat tërheqëse
Europa mbetet zgjedhja e parë e të anketuarve: 59% planifikojnë të nisin pushimet brenda rajonit, ndërsa 12% synojnë të bëjnë një udhëtim jashtë Europës (rritje me 3% që nga viti 2022). Ndërkohë, popullariteti i udhëtimeve të brendshme, ka rënë me 6%, ku vetëm 26% të udhëtarëve kanë zgjedhur një “qëndrim”, në muajt e ardhshëm.
Spanja mbetet destinacioni më popullor për udhëtarët, ku 8% planifikojnë pushime atje, e ndjekur nga Franca (7%), Italia (7%), Greqia (5%) dhe Kroacia (5%).
Megjithatë, destinacionet mesdhetare kanë parë një rënie prej 10% të vizitorëve, që synojnë të udhëtojnë atje nga viti i kaluar.
Përkundrazi, destinacione si Republika Çeke, Bullgaria, Irlanda dhe Danimarka, po përjetojnë rritje të popullaritetit. Kjo mund t’i atribuohet udhëtarëve, që kërkojnë destinacione më pak të populluara dhe temperatura më të ulëta.
Ngjarjet dhe udhëtimet e biznesit rifitojnë terren
Pavarësisht rritjes së kostove të jetesës, udhëtarët europianë po planifikojnë udhëtime të shumta. 33% synojnë të udhëtojnë dy herë dhe 26% të paktën tre herë këtë verë dhe vjeshtë. 30% e të anketuarve, po mendojnë të bëjnë vetëm një udhëtim (4% më pak se vitin e kaluar).
Për sa i përket kohëzgjatjes, shumica e udhëtarëve europianë (36%), zgjedhin të kalojnë më pak se një javë (katër-gjashtë netë) në destinacionin e tyre, ndërsa 27% synojnë të qëndrojnë shtatë-nëntë netë.
Udhëtimi drejt një destinacioni për një ngjarje ose festë po rritet, ku 10% e udhëtarëve europianë planifikojnë të udhëtojnë ndërmjet qershorit dhe nëntorit 2023, nga 4% në 2022. Përveç kësaj, ka pasur një rritje prej 4% në udhëtimet e biznesit, me 9% e të anketuarve. Pavarësisht një rënie prej 6% nga e njëjta periudhë në 2022, udhëtimet për pushime mbeten zgjedhja kryesoren për 68% të europianëve.
- Synimi për të udhëtuar në Europë, ka pësuar rënie 4%, krahasuar me një vit më parë, por mbetet i fortë.
- Më shumë turistë (+5% kundrejt 2022), zgjedhin të udhëtojnë në muajt “jashtë pikut”, në tetor dhe nëntor.
- Udhëtimet për ngjarje apo festa (10%) ose për biznes (9%), janë të dyja në rritje.
