Nga doktor i shkencave politike, ambasador Islam LAUKA
Pas heshtjes disamujore, sot u dëgjua përsëri cicërima e Riçard Grenellit dhe përsëri kundër Albin Kurtit. Cicërima e tij na bën të ditur se udhëheqësi i VV-së, jo vetëm qenkërka “majtist antiamerikan” i pandreqshëm, por edhe se “ka shkuar në drejtim terrorist”, kur ka hedhur gaz lotsjellës në Kuvendin e Kosovës për të penguar ratifikimin e Marrëveshjes së Demarkacionit me Malin e Zi.
Komenti im për cicërimën e Grenellit është ky:
Së pari, gazi lotsjellës është përdorur në emër të mbrojtjes së trojeve të Kosovës, që në bindjen e shumë shqiptarëve, përfshirë edhe timen, po tjetërsoheshin padrejtësisht në favor të Malit të Zi. Pra, bëhej fjalë për mbrojtjen e një parimi të shenjtë kushtetues, atë të integritetit territorial të vendit. Dua t`i kujtoj z. Grenell se në atë aksion nuk pati të vrarë, as akte vandalizmi e grabitje të pronës publike, siç ndodhi me falangat e nxitura nga shefi i tij në sulmin e 6 janarit mbi Kapitol Hill.
Së dyti, Grenelli, me siguri, duhet të jetë në dijeni se, me 14 shkurt, qytetarët e Kosovës votuan masivisht për Albin Kurtin, duke ndëshkuar rëndë ata që, në bashkëpunim me të, e patën përdorur “antiamerikanizmin” e Kurtit si instrument për ta hequr qafe sepse perceptohej si kërcënim serioz ndaj interesave të tyre meskine. Ashtu siç veproi edhe populli amerikan me Grenellin dhe Trampin, të cilët i ndëshkoi për dështimet pa fund në fushën e brendshme, por edhe për arrogancën e dukshme në fushën e politikës së jashtme, duke çuar në uljen e prestigjit dhe kredibilitetit amerikan në botë.
Prishtinë, mars 2021
