Kushtim Zeqir Halilit të Krasniqes (1853-1918), luftëtar, prijës, kuvendtar, dëshmor martir i Lirisë e Pavarësisë Kombëtare Shqiptare.
O Zeqir Halili i Krasniqes!
U rrite sa Pushka e Lirisë.
Te Flamuri Kombëtar u rrite.
Flamuri e Pushka t’u banë përmasa për lartësi
Në bjeshkë, në vrri, në histori…
Të gjej, o Zeqir Halili, të gjej:
Në Lidhjen e Prizrenit,
Në Lidhjen e Pejës,
Në Kryengritjen e Shkupit,
Në Shpalljen e Pavarësisë në Vlorë
Të shoh tue ecë bashkudhtarë…
me Hasan Prishtinën, Bajram Currin, Isa Boletinin…
me qindra e mijëra luftëtarë malësorë.
Në Qafë Morinë, Shkodër,
Në Plavë-Guci…
Në Junik, Gjakovë…
Në Shkupin dardan
Në luftë për nji Shqipëri të vetme,
Në luftë për Kombin tand.
Ka 100 vjet tue t’ardh te kulla jote bajrak,
Aty ku linde, në vrri, në Fang, skej Valbonës.
Ka 100 vjet tue të ardh te Kungji i Armëve
Aty, në bjeshkë tande alpine të Markofçes.
Ku mbete hero i përjetshëm
i bjeshkës, i kombit, i qiellit e i tokës.
Ramiz LUSHAJ
Shqipëri Etnike, 18 gusht 2018
