Atje mbaron toka e qielli fillon
E hije të bëjnë pëllumbat e egër,
E vera nuk ikën pa u bërë grua
Hyjnitë e lashta
Përditë i shpallin duel njëra-tjetrës për ty,
Bëjnë luftën që e kam fituar unë
Prej kohësh , bukuri e paemër
Po ti krejt pritat m’i paske zënë:
S’po më le të hyj në dimër
Zgjidh , më pate thënë
Në daç qiellin, në daç tokën
Në mua
Të zgjedh tokën ,mbetem pa qiellin tënd të perëndishëm,
Te zgjedh qiellin ,mbetem pa tokën tënde të lulnueshme
Lëshomi pritat,
E më ler të hyj në dimër
Të bëhem borë , e borë,e borë,
Qiell i rrëzuar në muzgje
E vajzat e reja të më bëjnë burrë prej bore,
Se brenda atij njeriu prej bore
Që fle përjashta në dimrat e botës
Është burri qiellor
Më ler të hyj në dimër !…
…….
