Poetja e talentuar Xhemi NOKSHIQI – MUZAI në SHBA ia kushton këtë poezi vendorigjinës së vet, Nokshiqit të historisë e krenarisë shqiptare, botuar te libri i saj poetik “All because…of you” – i shpallur “Libri poetik ma i mirë i Vitit 2019.
Nokshiqi i Plavës majë thepisur,
plot lulëkuqe është qëndisur,
gurët ndrisin dhe guroret,
kundruall me hënën, përmendoret.
Qiell i bruztë, nën hënë vetimash,
ti zbukurohesh me gjak trimash,
aty ku flasim me perenditë,
flasin shqip gjithë bukuritë…
U ndez lufta deri tek retë,
mbrojtën lirinë e mëmedheut,
aty zanat e hedhin shtatin,
trimat me besë aty vikasin,
fluturojnë plumbat me breshëri,
nokshiqasit në hjekë lypin liri.
Vitet 1880 në arkiva ndry,
marrëveshje kobi Turqi-Rusi,
me zhba e tret’ Nanën Shqypni,
me marrë Nokshiqin, Plavë e Guci…
Nokshiqasit trima, që përpijnë retë,
me besë a besë lidhen me vdekë,
ia ngushtojnë lakun atij Mark Milanit:
“Para vëllezër në fushë të mejdanit”!
Shqipja nanë po na lyp sot,
ne bijtë e Nokshiqit t’i dalim zot’’…
Vjen i pari Ali Smajl Mekuli
gjakun e derdhi mbi palë flamuri,
hekur brejnë me dhëmbë katër vllazni,
Mekuli, Buçajt, Mehaj, Selimi…
Shqipet furtunë, tokën kanë ndezë,
i bënë muranë shkijet serbë e malazesë,
në sisë të hanës pi qumësht liria,
dasmën e gjakut prin Ali Pashë Gucia…
Me gjamë e kujë që i solli deti,
rrethimin çan martiri Jakup Ferri
ujëvarë bjeshkësh larë me rrëke gjaku
në një kulm rrinë liria dhe pragu.
Shote Galicat ngritur në kambë,
Zhuje Selmani veton në çdo anë,
në krah të zanave mbartet Liria,
s’asht truall për krajla kjo Shqiptaria.
Nokshiqas jemi e kemi gjak iliri,
zemër shkëmb e zjarr prej graniti,
bijë dardanësh në rrjedha shekullore,
fluturon shqipja në tokën arbërore…
2019
