EUROPË, MOS MË QUAJ EMIGRANT

Europë, jam në oborrin tim.
Ja këtu në Britani, Francë, Gjermani e Greqi
Me Skënderbeun, Nënë Terezën, Napoleonin, Aleksandrin…
Jam me heronjtë e mi.
Bashkë ishim në luftë, bashkë jemi edhe në liri
Edhe tani, kur ti Emigrant më quan!

Europë, gjithë rininë time kam derdhur tek ti
Gërmuam bjeshkë, nxorëm metale
Ndërtuam kudhra, çekanë, tela e gozhda…
Gjak e djersë, shëndet e moshë…
T’gjitha t’i fala.
Por ti bën sikur nuk më njeh, më shtyen…
Pra, lidhmëni, kryqëzomëni, si Jezusin dikur!
Shtrimëni në kudhra, goditmëni me çekanë!
Se ne për këtë punë u kalitëm!

Europë, mos më injoro! Mos më quaj Emigrant!
Se n’i kthefsha gjithë heronjtë e mi në Shqipëri,
E me mbajtë nji kuvend, si dikur Skënderbeu në Lezhë,
Edhe njëherë besë me lidhë,
Edhe një kokë‘e një dorë’ n’Belvedere me i çu,
Përkrenaren dhe jataganin edhe i’herë me i bashku…
Europë, nuk mund të ta them se ç’frikë ndjen zemra ime për ty!

Poezia ime që u lexua nga artisti Festim Avdyli, me rastin e mbajtjes së Kongresit të Parë të Shkrimtarëve Shqiptarë, në Prizren.