Alice Walton, trashëgimtarja e vetme grua e pasurisë Walmart, nuk është vetëm gruaja më e pasur në Amerikë, por edhe gruaja më e pasur në të gjithë botën 68-vjeçarja gëzon një pasuri që vlerësohet me 43.7 miliardë dollarë.
Ajo së bashku edhe me dy trashëgimtarët e tjerë të pasurisë Walmart, Rob Walton dhe Jim Walton, kanë një pasuri që shkon deri në 133 miliardë dollarë.
Edhe pse Znj. Walton është gruaja më e pasur në botë, jeta e saj personale është shumë e rezervuar ndaj mediave dhe ajo parapëlqen të mos ekspozohet shumë pothuasje në të gjitha eventet që shkon.
Ndryshe nga vëllezërit e saj, asaj nuk i ka pëlqyer kurrë që të përfshihet në rolet drejtuese të kompanisë Walmart, por i është përkushtuar një fushe krejt tjetër nga ajo e biznesit, fushës së artit.
Kur ishte në moshën 10-vjeçare, ajo bleu veprën e parë të artit, një riprodhim i pikturës së Pikasos për vetëm 2 dollarë.
Ajo ka një koleksion shumë të madh veprash arti, me punë origjinale të piktorëve më të njohur amerikanë, të tillë si Andy Warhol, Norman Rockwell dhe Georgia O’Keefe.
Në vitin 2011, ajo hapi një muze i cili kushtoi plot 50 milionë dollarë, vetëm për të vendosur në të, të gjitha veprat dhe koleksionet e artit që ajo kishte blerë deri në atë vit, me një vlerë që shkonte deri në 500 milionë dollarë.
Në vitin 2014, ajo shpenzoi rreth 44.4 milionë dollarë për blerjen e një prej veprave të artit të piktores së famshme Georgia O’Keefe, njëkohësisht edhe një prej veprave të artit më të shtrenjta të blera ndonjëherë nga një grua.
Një tjetër pasion i saj janë edhe kuajt. Ajo shpenzon shumë në blerje dhe rritjen e kuajve të racave të ndryshme. Dy prej fermave të saj të fundit kanë kushtuar 19.75 dollarë dhe 22 milionë dollarë secila.
Në vitin 2014, ajo bleu një super apartament me pamje nga Avenue Park në Nju Jork, 25 milionë dollarë.
Kjo shtëpi është e rrethuar me 52 dritare gjigante xhami dhe ka rreth 558 metra katrorë hapësirë.
Edhe pse familja e saj ka bindje republikane, ajo dhuroi rreth 353,400 dollarë për fushatën zgjedhore të Hillary Clinton në vitin 2016.
Në vitin 2016, ajo i dhuroi 3.7 milionë të aksioneve të saj në Walmart (rreth 225 milionë dollarë) organizatës jofitimprurëse të familjes, Walton Family Foundation.
Kjo organizatë më pas i dhuroi 120 milionë Universitetit të Arkansasit, për të krijuar një shkollë arti.
