Tomas Edelmann, fermer kafeje i gjeneratës së katërt dhe nënkryetar i Coffee Farmer’s Co-op International në Meksikë, tha se ndërsa metoda e tyre e prodhimit të kafesë në hije është më rezistente ndaj thatësirës, një sezon i thatë më i gjatë se normalja, që ai fajëson mbi ndryshimet klimatike, shkaktoi që të korrat të vuajnë këtë vit.
Këto kosto më të larta të prodhimit, mund të çojnë në inflacion të çmimit të kafesë: Dashamirët e kafesë mund të duhet të paguajnë më shumë në të ardhmen ndërsa çmimet rriten. Pjekësit dhe ekspertët e kafesë po sinjalizojnë gjithashtu, se çmimet mund të mbeten më të larta për më gjatë, pasi faktorë si ndryshimet klimatike reduktojnë ofertën globale të kafesë.
Organizata Ndërkombëtare e Kafes (ICO), një organizatë ndërqeveritare e themeluar në vitin 1963 me mbështetjen e Kombeve të Bashkuara, raportoi muajin e kaluar se çmimi i treguesit të përbërë ICO – një çmim kyç referencë për industrinë globale të kafesë – arriti një nivel mesatar 13-vjeçar 226.83 cent, ose rreth 2.27 dollarë për paund (1 paund lbs = 0.453592 kg).
“Kafja është një mall shumë i ndërlikuar. Një pjesë e kësaj arsyeje është sepse ka kufizime të shumtë të ofertës dhe kërkesës, që ndikojnë në çmim, ” tha Ryan Delany, themelues dhe analist kryesor në Akademinë e Tregtisë së Kafeve.
Dhe, tha ai, thjesht nuk ka mjaftueshëm kafe në botë.
Ndryshimet klimatike rritin çmimet
“Kafja është më e ndjeshme ndaj ndryshimeve të temperaturës se shumë kultura të tjera,” tha Michael Hoffmann, profesor në Kolegjin e Bujqësisë dhe Shkencave të Jetës në Universitetin Cornell. Dhe ngjarjet e fundit të lidhura me klimën nuk po ndihmojnë prodhimin.
“Ndryshimet klimatike po përkeqësohen. Vetëm imagjinoni motin më të ashpër, temperaturat në rritje dhe efektin e drejtpërdrejtë te njerëzit, që punojnë në plantacionet e kafesë,” tha ai. “Ndoshta për konsumatorët, kafeja thjesht do të bëhet më e shtrenjtë.”
Brazili është prodhuesi numër një i llojit të kafesë Arabica në botë, varieteti premium i kafesë, që përbën mbi 60% të të gjithë prodhimit të kafesë.
Kështu, kur një ngricë jashtëzakonisht e fortë shkatërroi të korrat në verën e vitit 2021, tregu i kafesë u godit menjëherë, pasi kontratat futures të kafesë në SHBA, të cilat ndjekin Arabica, arritën një nivel maksimal prej 260 cent për paund. Sipas Delany, çmimet e kafesë janë zakonisht midis 100 dhe 140 cent, por kanë qëndruar vazhdimisht mbi atë interval për tre vitet e fundit.
Por, ndikimi i ngricave nuk përfundoi në ofertën dhe çmimin e Arabica.
Delany shpjegoi se nuk është e pazakontë të shohësh blerësit të kalojnë midis Arabica dhe Robusta, një lloj më i lirë kokrrash, që përdoret në kafenë e çastit. Dhe me më shumë njerëz, që derdhen në treg për Robusta, kjo ndikon gjithashtu në çmim.
Në veçanti, Departamenti Amerikan i Bujqësisë raportoi në maj se Vietnami, prodhuesi kryesor i Robusta-s, pësoi disa vite mot të pafavorshëm, që ka parë rënie të niveleve të eksportit me 7%. Ai vuri në dukje në raportin e tij vjetor të vitit 2023, se priste që kushte të tilla të motit të bëheshin më të shpeshta “për shkak të ndryshimeve klimatike”.
Çfarë do të thotë kjo për kafenë tuaj?
Shitësit me pakicë të kafesë tashmë e kanë ndier presionin.
Prodhuesi italian i kafesë Lavazza tha se rriti çmimet këtë vit për një sërë arsyesh. “Një kombinim i korrjeve të dobëta, ndryshimet klimatike, lufta në Ukrainë, konflikti në Detin e Kuq, ndërhyrja e spekulatorëve dhe dollari i fortë ka krijuar një ‘stuhi të përsosur’ për industrinë e kafesë, që ka parë spirale të çmimeve që nga pandemia.
Dhe presidenti i kompanisë, Giuseppe Lavazza, tha se ai parashikonte, që çmimi i kafesë së supermarketeve në MB, të rritet me 10 % shtesë.
Ndërkohë, pronari i Nescafe Nestle ia atribuoi një rënie të marzhit të fitimit të tij në vitin 2023, rritjes së kostove të Robusta. Kompania raportoi në qershor, se u përball me një mjedis çmimi më sfidues, pasi konsumatorët e ndërgjegjshëm për buxhetin, u tërhoqën pas rritjeve të mëparshme të çmimeve.
Dashamirët e Starbucks, nga ana tjetër, ndoshta nuk do të shohin ende një çmim më të lartë për pijet e tyre, pasi kompania blen kafe shumë më parë, duke përdorur atë, që njihet si kontrata me çmim fiks ku pranon të blejë kafe me një çmim të caktuar, për një periudhë të gjatë kohore dhe përdor strategji mbrojtëse për të mbyllur çmimet, duke mbrojtur klientët nga luhatjet e tregut.
Pavarësisht rritjes së çmimeve, ka një gjë për të cilën ekspertët mund të jenë të sigurt: Kërkesa për kafe nuk do të ndryshojë. / CNN