India pritet të hedhë në treg një version digjital të monedhës së saj, rupies. Plani për monedhën digjitale gjen mbështetje të gjerë dhe popullariteti i kriptomonedhave është në rritje.
Hedhja në treg e një monedhe digjitale të Bankës Qendrore (CBDC) synon t’i japë një shtysë ekonomisë digjitale dhe të sigurojë një alternativë ndaj monedhave virtuale private që janë përhapur kohët e fundit. Puna për këtë projekt ambicioz vazhdon prej mëse një viti.
Kufizim i tregtisë së kriptomonedhave
India po përgatitet po ashtu të shtrëngojë tregtinë e kriptomonedhave, e cila po lulëzon, pasi mendon se ato mund të përbëjnë shqetësime serioze për stabilitetin makroekonomik dhe financiar dhe të bëhen rrugë për pastrimin e parave, mashtrimin dhe financimin e terrorit.
Vlerësohet se në Indi ka 15 deri në 20 milionë investitorë të kriptomonedhash me vlerë të përgjithshme prej rreth 400 miliardë rupiesh indiane (4.68 miliardë euro).
Rreziqe të shumta
“Ne po e shqyrtojmë me kujdes procesin pasi ka rreziqe të shumta. Rreziqet më të mëdha lidhen me sigurinë kibernetike dhe mundësinë e falsifikimit,” u tha mediave lokale guvernatori i RBI Shaktikanta Das.
Monedhat digjitale të emetuara nga RBI do të numërohen në njësi dhe ashtu si çdo kartëmonedhë tradicionale do të kenë një numër unik. Vetëm forma e saj është e ndryshme.