Bashkimi Evropian njoftoi të enjten se i ka ndarë Turqisë gjashtë miliardë euro për të trajtuar problemin me migrantët sirianë, raporton AFP.
Ankaraja kishte kërkuar nga BE-ja të ndajë fonde për migrantët në mënyrë që t’i mbajë ata në territorin e vet dhe të mos lejojë shkuarjen e tyre në vendet evropiane.
Në vitin 2015 rreth një milion njerëz arritën në Evropë. Brukseli dhe Ankaraja ranë dakord më 2016 për të zgjidhur këtë çështje.
Policia franceze shkatërron me forcë një kamp të migrantëve
Sipas marrëveshjes, Turqia u zotua të pranojë kthimin e migrantëve që mbërrijnë në Greqi dhe të bëjë më shumë për të ndaluar rrugëtimin e tyre në këmbim të gjashtë miliardë eurove (7,20 miliardë dollarë).
Presidenti turk, Reccep Tayyip Erdogan, disa herë e ka akuzuar BE-në për mospërmbushjen e premtimeve duke thënë se Ankaraja ka shpenzuar 40 miliardë dollarë për më shumë se 3.6 milionë refugjatë sirianë që jetojnë në Turqi.
“Sot shënohet përfundimin e kontraktimit të gjashtë miliardë eurove si mbështetje e BE për refugjatët dhe komunitetet pritëse në Turqi”, tha Nikolaus Meyer-Landrut, i dërguari i BE-së në Ankara.
Paratë e BE-së janë caktuar për projekte të veçanta sociale brenda Turqisë për të ndihmuar refugjatët dhe nuk do t’i paguhen drejtpërdrejt qeverisë turke. Kjo çështje ka qenë edhe arsye e ngritjes së tensioneve midis bllokut dhe Turqisë.
Në fillim të këtij viti, Erdogan tha se Turqia nuk do të ndalojë migrantët të shkojnë në territorin e BE-së, por më vonë hoqi kërcënimin.
Ai u përpoq të bënte presion në Bruksel për t’i dhënë më shumë mbështetje Turqisë në funksion të konfliktit sirian, veçanërisht pasi dhuna u ndez në rajonin veriperëndimor të Idlib-it.
Migrantët kanë ikur në Turqi pasi shpërtheu konflikti pas protestave anti-qeveritare në Siri më 2011. Llogaritet se nga konflikti kanë vdekur rreth 400.000 persona.